Llucía Fernández encabezará la llista al Congresu, y Arturu Xosé Bermeyu al Senáu
«La de nueso ye una candidatura de llucha poles llibertaes, escontra’l facismu y polos drechos sociales. La única opción, de fechu, que tien a Asturies comu marcu de referencia y que defenderá los drechos del Pueblu Asturianu» declaró Llucía Fernández, candidata por Andecha Astur al Congresu estatal. Arturu Xosé Bermeyu, cabezaleru na llista al Senáu, remarcó que “namás dende’l Soberanismu sedremos quien a finar cola monarquía española”.
La participación nestes elleiciones estatales del 28 d’abril n’Agora Repúbliques con otres fuercies soberanistes: ERC, EHBildu, BNG, Puyalón y Ahora Canarias, permite ufiertar una alternativa política con posibilidaes riales de condicionar de forma efeutiva la política a nivel d’Estáu y avanzar nel procesu d’esaniciu de la monarquía española y l’aniciu d’un procesu costituyente de Repúbliques de drechos y llibertaes presonales y colleutives.
Pa poder participar nestes elleiciones, tres la postrer reforma de la llei elleutoral, Andecha Astur tendrá que recoyer la firma de más de 1.000 presones censaes n’Asturies nun plazu de 20 díis, una torga antidemocrática dafechu cola que l’Estáu pretende llimitar la participación de formaciones polítiques minoritaries. Ello asina, ente’l 4 y el 24 marzu Andecha Astur entamará a recoyer estes firmes, que nun tienen calter vinculante y namás suponen la conformidá con que Andecha Astur pueda presentase a les elleiciones, un drechu democráticu básicu.
