Asturies cunta dende agora cola representación algamada nel Congresu -19 diputaos- y nel Senáu -11 senaores- al traviés de la coallición Agora Repúbliques, de la qu’Andecha Astur forma parte. De toes formes, los resultaos algamaos n’Asturies nun son nin los que deseyábemos nin pa conformase. Somos coscientes de la situación qu’estes elleiciones dibuxen n’Asturies y de cuálos son los aspeutos nos que más mos tenemos qu’esforciar d’equí p’alantre.
Ye cierto que les circustancies nes que se dieron estes elleiciones yeren bien abegoses, que’l bloquéu mediáticu foi dafechu y que’l votu tuvo bien condicionáu pola allarma social y el “votu útil” p’aparar a la ultradrecha, y que frente a los 909 votos al Congresu, los 5465 votos al Senáu espeyen una tendencia de lo que ye’l votu “deseyáu” frente al votu “pragmáticu”, pero asina y con ello tenemos de reconocer que nun fuimos quien a francer la dinámica d’un soberanismu/asturianismu que se somete al sucursalismu español por un malentendíu votu útil, col que ta afondándose na sumisión y dependencia.
Pesia ello, sabremos sacar d’estos resultaos elleutorales consecuencies positives que mos reforzarán comu organización al sirviciu d’una Asturies soberana y socialista, y afondaremos entá más nel procesu de puntos mínimos y frente ampliu, que mos permita xuncir esfuercios y voluntaes en defensa de los drechos individuales y colleutivos del pueblu asturianu.
Asina mesmo, nesta situación de grave cris que carez Asturies y nestos tiempos de dura práutica hexemonista del españolismu, queremos reconocer el valor y el compromisu de toles asturianes y asturianos que mos aidaron a caltener (cola so condidatura, col so llabor, col so votu…) la única opción asturiana pente toles que concurrieron a estes elleiciones. Que nestos tiempos tán difíciles p’Asturies, el país tenga entá’l corax y el compromisu necesariu pa caltener una opción soberanista d’esquierda énte l’Estáu español ye dalgo qu’hai de saber valorar.
Per otru llau tenemos de solliñar l’aciertu d’Andecha Astur al apostar dende un entamu pola coallición Agora Repúbliques, de la que formamos parte, y que perpasó’l 1.300.000 votos, algamando representación nel Congresu y Senáu español -19 diputaos y 11 senaores- de tala miente qu’Andecha Astur va poder llevar al Congresu y Senáu españoles los problemes que carez Asturies y va poder trabayar ellí poles soluciones que desiximos, gracies a la collaboración de toles fuercies soberanistes d’esquierda.
Esta nuea rialidá, xunto cola mesma coallición afitá pa les prósimes elleiciones europees, abre nueos horizontes pal nacionalismu asturianu y permite qu’Andecha Astur se puea ufrir comu un puntu d’alcuentru y trabayu en común pa lluchar en toles estayes polítiques polos avances y soluciones qu’Asturies necesita.
Ello asina, fixámosmos les prósimes elleiciones nacionales y de conceyu como un oxetivu a curtiu plazu p’afitar presencia y resultaos, comprometiéndomos a redoblar la xera y l’esfuerciu pa caltener la opción que representamos, pa que seya visible la coherencia y viabilidá del proyeutu qu’ufrimos a la nación asturiana, y p’averase a tolos seutores sociales ufriéndo-yos la posibilidá de participar no que tien de ser un proyeutu común del soberanismu/asturianismu.
