Inicio > Asturies > Agora ye l’intre d’Asturies y de los asturianos
AsturiesConceyosCultura asturianaLlingua AsturianaMediu AmbienteMocedáMuyerPortadaXunión Europea

Agora ye l’intre d’Asturies y de los asturianos

Llucía Fernández Marqués, candidata d’Andecha Astur, ñacía en Xixón nel añu 1974, diplomada n’Empresariales y Rellaciones Internacionales, ma de familia numberosa monomarental, anguañu desemplegada. Collabora voluntariamente en delles asociaciones de calter cultural, social, de defensa a l’atención a les necesidades educatives especiales y de prevención y actuación énte’l maltratu, acosu y abusu infantil. Tien espublizaos dellos llibros y tornes n’asturianu, amás d’abondos artículos y reportaxes en revistes y páxines ueb

– ¿Cuálos son los tos anicios en política?

Díficil entruga… quicias los recuerdos de la represión brutal nes manifestaciones del Naval, la Oficialidá y la minería, siendo yo rapacina, foron los que me marcaron el camín. Con 13 años entamé a furrular en “Xorrez”, una organización de mocedá nacionaliega. De magar entós nun aparé de lluchar pol país.

– Presénteste a tres candidatures, de cabezalera por Xixón y Asturies y la 25 de la llista europea… ¿porqué?

Dende un entamu yéremos coscientes del escasu o nulu espaciu que la prensa diba dexar a la nuesa dimposición y la poca visibilidá que tendríen los nuesos candidatos, polo que se decidió qu’una sola persona fore la imaxen visible de la organización. Per otru lláu, Andecha Astur furrula de forma asamblearia ya ensin protagonismos, polo que nun esisten les lluches de poder qu’hai n’otros partíos.

Decidióse que yo yera la meyor opción pola mio llarga trayeutoria política, que me llevó a representar los intereses asturianos nel Parllamentu Européu en delles ocasiones, pola mio preparación y porque na mio situación actual conozo y represento perfechamente los principales problemas de la xente n’Asturies.

¿Qué vos estrema d’otros partíos que se presenten a estos comicios?

Muncho. Pa entamar, somos los únicos asturianos y los únicos que defendemos Asturies ensin inxerencies esternes, eso ya mos convierte nuna propuesta radicalmente estremada al restu. Nun tenemos que rendir cuentes a naide nin somos sucursales de dengún poder centraliegu, tenemos llibertá p’anteponer Asturies a cualisquier otru porgüeyu.

Defendemos la República asturiana, refugamos el marcu costitucional español por monárquicu, discriminatoriu, represor ya incumplíu nos únicos puntos que podría ser positivu (ex. igualdá, trabayu, vivienda…). De la mesma manera refugamos l’actual estatutu d’autonomía, que mos impunxeron dende Madrid y que mos relega a ciudadanos de segundu orden.

Denunciamos l’enfotu del Estáu español de finar cola nuesa identidá y col texíu socioeconómicu del país a costafecha, nun auténticu xenocidiu diferíu que mos va dexando morrer d’apocu y rebelámosmos escontra ello.

Defendemos el nuesu futuru comu Pueblu Asturianu, con un espaciu económicu, cultural, y social propiu, sofitando’l territoriu enteru asturianu, ensin crear guetos nin desiertos, nin muncho menos convertir Asturies nun parque temáticu de si mesma.

Lluchamos poles llibertaes, los drechos y la calidá de vida del pueblu asturianu perriba de cualisquier indicador macroeconómicu y perriba de los intereses capitalistes.

Arriendes d’ello somos los únicos que defendemos y siempres defendimos de veres la oficialidá ya l’usu del asturianu (y les sos variantes nes sos fasteres) amosando una coherencia mui estremada de los otros partíos.

No que cinca a organización territorial, refugamos poner l’enfotu nel aria metropolitana y proponemos recuperar la cadarma de “poles” na que’l territorio s’encadarma alrodiu de dellos cientros comunicaos pente si.

Y munches más desemeyances…

Falabes d’oficialidá ¿Sedrá esta la llexislatura qu’aprobará por fin la oficialidad del asturianu?

Si d’Andecha Astur depende, sí.

El pueblu asturianu ta llevando a partios tradicionalmente opuestos a la mesma a replantegase les sos postures y confiamos en que la presión popular llegue a conseguilo, pero por agora la oficialidá ta siendo utilizada esclusivamente comu caladeru de votos. Como preba d’ello, el fechu de que namás Andecha Astur presente la so documentación, campaña completa y programes n’asturianu y sobro tou, que seya la única organización que permite votar n’asturianu (gracies a una resolución del Tribunal Costitucional del 2000, cuando Andecha llevó esti drechu a los tribunales).

Si los que presumen de defensores de la llingua lo fueren realmente, sedría oficial hai años, nun ye más que posturéu. El PSOE tuvo infinidá d’oportunidaes y Podemos, ente munches otres cuestiones, pudo plantegalo comu inrenunciable na negociación de los presupuestos, pero nun lo fizo porque pa ellos ye un tema secundariu y lo principal yera obedecer les directives dictaes dende Madrí.

 ¿Tenéis en programa dalguna iniciativa sobro la despoblación, especialmente na fastera rural?

Ye ún de los nuesos pegoyos. Llevamos décades denunciando la despoblación, lo que llamamos el “xenocidiu anunciáu” del pueblu asturianu.

Defendemos la reactivación de tolos seutores productivos -tradicionales y non- y vamos convertir esti país, que nunca me cansaré de dicilo, tien bayura pa ello, nun llugar nel que podamos quedanos a vivir y al que puedan volver los que se vieron forciaos a colar.

El desdexamientu y l’avieyamientu de la población nes zones rurales desixe una intervención urxente, ye imprescindible recuperar l’agricultura y la ganadería (mesmo que la pesca) comu parte non solo de la economía asturiana, sinon de la nuesa cultura ya identidá.

L’aniciu de redes de produción y consumu de productos propios pa conseguir mayores cotes de soberanía alimentario, la igua de les infracadarmes, el fin del abandonu y la garantía de los servicios básicos nos pueblos, facilitar l’acesu a viviendes rurales a las presones desfiuciaes, toos ellos son dalgunos de los medios que proponemos pa que los nuesos pueblos seyan repoblaos.

¿Cuála ye la to motivación para preséntate a la candidatura europea?

Presentamos a la candidatura europea yera necesario, seique reconocemos que’l modelo de Xunión Europea vixente, encadarmáu por y pal gran capital, nun ye’l nuesu, pero ye ellí onde se deciden un altísumu porcentaxe de les polítiques que mos afeuten, polo qu’albidramos qu’Asturies tien que tener ellí voz propia, ensin intermediación española.

Toi mui illusionada col proyeutu Agora Repúbliques, que mos dará pente 3 y 4 representantes que treslladarán al parllamentu europeu les necesidaes y problemes de los asturianos, comu yá se fizo n’anteriores llexisllatures con “Los Pueblos Deciden” (precursora de A.R). Yo presonalmente tuve ellí llevando custiones tan importantes como la oficialidá, denunciando los fraudes d’El Musel y los Fondos Mineros o entregando los datos riales de la contaminación atmosférico énte la comisión europea del mediu ambiente.

De fechu, ya tenemos dalgún tema pensáu pa llevar al Parllamentu Européu nes prósimes selmanes… ya vos diremos cuntando.

 

¿Qu’espeutatives teneis d’estes elleiciones?

Dependemos de los asturianos soberanistes y de toos aquellos que dicen querer la oficialidá y defender los drechos del pueblu asturianu pa que mos dean el so votu nun exerciciu de sentíu común y coherencia.

Esperamos que los miles de votos que recibimos pal senáu se xunten con munchos más y se conviertan en más miles de votos p’Andecha Astur y Agora Repúbliques que den voz al pueblu asturiano n’Europa y n’Asturies.

 

¿Y dempués d’elles?

N’Andecha tamos echando a andar una república firme y bien afitada, pasiquín a pasu. Queda muncho por trabayar, pero pa cuando finemos tendremos un país que podamos llamar nuesu, onde vivir dignamente, ser llibres, colos drechos intautos, falando la llingua de nueso, siendo nos mesmos. Eso ye un trabayu de ca díi, non solo de les elleiciones: nóstamos ya pensando nel 27 Mayu ya en siguir cola xera.

De fechu, recién aniciamos un procesu de creación d’un frente ampliu con tol soberanismu/asturianismu dende unos puntos mínimos que mos permitar ufrir un proyeutu viable pa la sociedá asturiana en defensa de los sos intereses y drechos, individuales y colleutivos, un alcuerdu que ya firmaron representantes de delles asociaciones y persones independientes y que ta abiertu a quien comparta con nos l’enfotu d’una Asturies llibre y soberana.

 

¿Quies mandar un mensaxe a los asturianos?

Si. Que ye agora, que ye l’intre d’Asturies y de los asturianos.

Perriba’l votu útil, el del miéu o’l de les mentires, yo pídovos el votu que val, el votu a Andecha Astur.

Pido’l votu de la coherencia. El de la xente que fae lo que diz y diz siempre lo mesmo. Y esi votu, n’Asturies, tien namás un nome: Andecha Astur, Agora Repúbliques.

Deja un comentario

Tu dirección de correo electrónico no será publicada. Los campos obligatorios están marcados con *