Dende l’añu pasáu, 2008, venimos sintiendo a los responsables de la política mundial falar d’una crisis económica global ensin precedentes na hestoria reciente, siendo la consecuencia más grave d’esta crisis la pérdida de puestos de trabayu, ello ye, el desemplegu.

Pero lo cierto ye que n’Asturies venimos sufriendo esa crisis dende cuantayá por mor del colonialismu capitalista al que mos somete’l Reinu d’España: desaniciu de l’actividá económica tradicional (agricultura, ganadería y pesca); “reconversión” del sector industrial, acompañada de miles de prexubilaciones; emigración forciada de la mocedá a la gueta d’un trabayu dignu; etc.

Énte esta situación, el gobiernu títere del “Principado” (anguañu formáu por PSOE ya IU-Bloque por Asturies-Los Verdes), cola complicidá de los sindicatos UGT y CCOO y de la patronal FADE, vieno plantegando comu “solución” polítiques basaes nel fomentu de la especulación urbanística y de la masificación turística.

Poro, dende ANDECHA ASTUR queremos denunciar nuevamente esta situación cola campaña “ESTO NUN YE PLAN: 75.000 PARAOS” centrada precisamente nes midíes puestes en marcha pol Gobiernu d’España pa facer frente a la crisis y que s’encadarmen al traviés del “Plan Español para el Estímulo de la Economía y del Empleo”, conocíu comu “Plan E”, que nun dexa de ser un preséu empobináu a meyorar la situación de les entidaes bancaries y de delles empreses de la construcción.

El “Plan E” tien cuatru exes d’actuación: midíes de sofitu a empreses y families, midíes de fomentu del emplegu, midíes financieres y presupuestaries y midíes de modernización de la economía. Lo curioso ye que nel nuesu país sólo vemos miles d’euros gastaos no de siempres, en formigón, y marafundiaos en grandes panelones publicitarios del plan: COLO QUE COSTAREN TOLOS PANELES LLANTAOS N’ASTURIES PODRÍA PAGASE UN SUELDU DE 1.200 €, DURANTE UN AÑU, A MÁS D’UN CIENTU PERSONES.

ANDECHA ASTUR quier denunciar cola campaña “ESTO NUN YE PLAN: 75.000 PARAOS” la ineficacia d’esti plan español, un parche ridículu que nun ta sirviendo namás que pa que s’enriquezan los de siempres y que nun contribúi pa nada al amenorgamientu’l paru.

De fechu, tamos acabantes de conocer que nel segundu trimestre de 2009 el desemplegu xubió n’Asturies en 9.900 persones, asitiándose’l númberu total de paraos en 68.400 persones y el porcentaxe de desemplegu sobre’l total de la población activa nel 14’04 %. Si les coses siguen asina, a finales d’añu llegaremos a los 75.000 paraos y quedará n’evidencia que’l “Plan E” NUN YE PLAN.