Enguiza a ecoloxistes y ganaeros cola tema del llobu mentes continúa esfarrapando l'agroganadería asturiana

El nuevu Conseyeru d’Infracadarmes y Mediu Ambiente del “Principado”,  Fernando Lastra, bien de definir con claridá la que mui probatiblemente sedrá la so política a la hora d’enfrentar el problema del llobu: continuar cola inoperancia actual y centrase n’enguizar a los ganaeros y a los ecoloxistes, mentes el problema persiste, tapeciendo'l problema de fondu que costitúi l'esfarrapamientu del texíu socio-económicu arreyáu al seutor agroganaderu.

Esta tema involucra ya enfrenta a dos seutores perimportantes de la población asturiana, de los que depende la pervivencia de la nuesa biosfera y de les nueses formes de vida más tradicionales, que foron siempre aquelles que vivíen en comuña cola ñatura. Dos estayes que, xuníes, podíen facer muncho bien por caltener la bayura los nuesos montes, pero qu’enfrentaes gasten enerxíes en marraces valeres, demientres los que bramente tienen la obligación y la posibilidá d’actuar continuen ensin plantegar soluciones científiques, mata

ndo llobos cuasique al debalu como única opción y ensin dar un pasu alantre que permita la convivencia pente especies.

Midíes preventives, autorizacion de dexar carroñes en monte, controles mediante dron, señales acústiques que torguen la entrada de los llobos con infrasoníos, capadura seleutiva, meyora y control de les indemnizaciones… son abondes les soluciones propuestes, per un y otru llau, viables económicamente gracies a los fondos europeos pa la protección d’especies y desoyíes sistemáticamente pola alministración asturiana, a quien nun interesa una solución real y que tolo soluciona ordenando más muertes de llobos, nesti casu camudando los alcuerdos algamaos pa ordenar l’abatimientu d’otros dos na vertiente asturiana del parque Nacional de Picos, onde ya s’autorizare la muerte d’otros cuatro exemplares recientemente.

Esta decisión tómase anantes de que tenga llugar l’anunciáu conceyu del conseyeru con tolos seutores implicaos “col envís d’algamar un consensu”, consensu qu’ensin dubia sedrá difícil algamar nesti ambiente enllordiáu.

Metantu y non, sigue tapeciéndose'l problema principal: el caón al que llevaren al conxuntu del seutor agroganaderu asturianu y la falta de perspeutives y futuru al que lu conderguen les polítiques españoles cola collaboración del gobiernu sucursal del "Principado"