Arturu X. Bermeyu respuende a les declaraciones del cabezaleru del PSOE, Pedro Sánchez, falando de Galicia, Cataluña y País Vascu como naciones, escaeciendo Asturies,  “nesti casu la inorancia nun ye disculpa. El “nueu” PSOE de Pedro Sánchez ye’l de siempres, y pa ellos Asturies nun ye más qu’una “bonita provincia del norte”.

Nel mesmu sen, y respeutu a los plantegamientos de plurinacionalidá defendíos por Pedro Sánchez namás pa eses tres naciones del estáu, afirma que “la reconocencia de la Plurinacionalidá pol PSOE namás supón el postrer pasu p’afitar un Estáu que reconoza namás a lo que falsamente dieren en llamar “naciones hestóriques”, negando-y identidá y drechos a Asturies.”

 “La imposición dende Madrid del Estatutu d’Autonomía, del propiu “Principado” como istitución, ya inclusu’l nome del país que pasaren a denominar “Principado de Asturias” fo’l  primer pasu de la negación de la identidá asturiana, la negación non solo de la so hestoria, sinon del so futuru, y con esta obligada reconocencia de la “plurinacionalidá”, el PSOE quier afitar esta situación y asimilar definitivamente a Asturies, faciéndola práuticamente un barriu de Madrid”

Ello asina, Arturu X. Bermeyu considera que “tamos nun puntu d’inflexón perimportante nel qu’Asturies ta xugándose’l so futuru, y ye preciso facer una frente común ente tolos asturianos. Hai que buscar lo que mos xune que ye’l país y desdexar lo que mos separta. Tenemos l’enemigu enriba y hai que defendese como seya”.

El Drechu a Decidir ye un tema que ta na cai, agora con Cataluña en plenu procesu y Asturies, como nación hestórica, tien que llevantar la voz y reivindicalu porque-y correspuende. Nesti sen, Andecha Astur entamará, el 8 setiembre, una Concentración y un Referendum simbólicu pa exercer ún de los drechos democráticos más básicos.

“El Drechu a Decidir ye garantía de sobrovivencia pal Pueblu Asturianu”