Andecha Astur amuesa la so solidaridá pa cola xente y colleutivos que lleven trabayando dende va unos años nel Mataeru de La Pola Sieru nos momentos d’incertidume que se tan viviendo acerca de la continuidá d’esti espaciu públicu

ANDECHA SIERU.- Queremos amosar la nuesa sospresa al ver como L’ayuntamientu ta aprofitando una avería llétrica pa desagospiar un espaciu que ye del pueblu, declarando en ruina un edificiu que nun tien más qu’una avería llétrica, con fines netamente especulativos. Pa nós ta nidio que’l declarar en ruina d’un díi pa otru un edificiu, ensin informe téunicu nin otru documentu que lo avale,  nun ye sinón un casu d’especulación urbanístico qu’utiliza esta maniobra pa desagospiar un espaciu hestóricu y del pueblu que va pasar por baltiar esti edificiu.

Nun podemos escaecer que tamos falando d’un edificiu hestóricu de La Pola, resclavu d’un tiempu en que l’actividá ganaera permitía cuntar con un mataeru públicu municipal, colo que el so esbarrumbe sedría un ataque al padrimoniu y a la hestoria del conceyu, de la fastera y del país: una bones finaron con campu y la ganadería, quieren finar agora cola hestoria mesma.

Poro, desiximos al ayuntamientu que recule nes sos intenciones y lu devuelva a la xente pa que pueda caltener esti edificiu y continuar esfrutándolu, d’una forma autoxestionada ya ensin la inxerencia nin del ayuntamientu nin d’otru tipu d’istituciones.

"Ye mui guapo encamentar al Gobiernu y a la Xunta Xeneral una reforma del Estatutu pa declarar la oficialidá, pero ¿por qué Mieres nun sigue l'exemplu de Bimenes y se declara la Oficialidá? o polo menos unes Ordenances de Conceyu que reconozan los drechos llingüísticos de los mierenses, como en Noreña. Al rodiu la Oficialidá hai munchu posturéu y poco compromisu"

Lola Suárez, cabezalera de la Estaya de Llingua y Cultura Asturiana d'Andecha Astur valoró positivamente encamentar al Gobiernu y a la Xunta Xeneral una reforma del Estatutu pa declarar la oficialidá, pero criticó la falta de compromisu del Conceyu Mieres onde la composición de la Corporación de Conceyu permitiríe una declaración d'Oficialidá semeyante a la de Bimenes y l'aprebación d'unes Ordenances de Conceyu que reconozan los drechos llingüisticos de los vecinos.

"Na práutica totalidá de los Conceyos onde hai mayoría de conceyales de formaciones polítiques teóricamente respetuoses colos drechos llingüísticos de los vecinos, Podemos, IU y Foro principalmente, nun tan faciendo un res pola oficialidá de la llingua asturiana y estrémense perpoco de lo que fain los Conceyos con mayoría del PP, PSOE, enemigos declaraos del asturianu"

Andecha Astur vien de remembrar al Ayuntamientu d’Uviéu'l so fallu por omisión na aplicación de la llei de Memoria Hestórica al non retirar el nome de Sabino Fernández Campo a la cai, parque infantil y estatua a nome d’esti presonaxe, desixendo que se tomen darréu les medies oportunes pa camudar esti fechu.

Sabino Fernández Campo  ye reconocíu falanxista y presuntu asesín de multitú de conciudadanos del conceyu d’Ayer, tando tamién venceyáu, según otres fontes, al espoliu del padrimoniu hestóricu-artísticu del Duque d’Hernani, espoliu fechu a favor de Ca’l Rei.

Consideramos el nuesu deber ser valedores de la memoria de tolos ayeranos y republicanos españoles que foron pasaos poles armes, desixendo que se camuden darréu tolos homenaxes públicos qu’en forma de cai, parque y escultura se caltienen col nome de Sabino Fernández Campo.

“Nun val namás con facer declaraciones oficiales favorables a la Oficialidá, hai que concretales llegalmente ellí onde se tien capacidá pa ello”.

Tres el plenu del pasáu xueves 9/11/2017 nel que l’Ayuntamientu Xixón aprebó una declaración respaldando la oficialidá del asturianu y pidiendo la reforma del Estatutu pa incluyila, Andecha Astur vien de presentar en dichu ayuntamientu una propuesta d’unes Ordenances Municipales d’Oficialidá, que dean conteníu rial a esa voluntá de normalización democrática en materia llingüístico que supón la oficialidá de la llingua d’Asturies, faciéndola efetutiva polo menos nel conceyu Xixón; entamando asina un procesu nel que d'esistir la voluntá que se presumee nes declaraciones feches dende Podemos, IU y Foro, podríemos dir avanzando polo menos a nivel de conceyu mentes llega la reforma estatutaria que recueya la oficialidá.

Lola S. Vallina desplicó que la reconocencia de los drechos llingüísticos de los vecinos de Xixón a nivel de Conceyu nun sustitúi la necesaria oficialidá de la llingua a nivel nacional, pero supondríe un perimportante avance, con efeutos práuticos inmediatos, munchu más eficaz que “declaraciones ensin plazos nin compromisos que fasta agora va quedando en puru posturéu ensin repercusión práutica”.

La renuncia de la Dellegación del Gobiernu español n'Asturies  a recurrir les ordenances d'oficialidá del conceyu supón un avance nel procesu d'Oficialidá de la llingua asturiana a nivel nacional.

La ordenanza municipal del asturianu, aprebada en Noreña a propuesta de Conceyu Abiertu, entra yá en vigor tres cumplir tolos trámites llegales, una vuelta que la Dellegación del Gobiernu español n'Asturies, que nel so momentu reclamare l'anulación de la ordenanza, renunció a exercer esi llabor represivu.

Ye la primer vegada que dicha Dellegación nun recurre una ordenanza d'oficialidá n'Asturies, y supón un puntu d'inflexón na dinámica de represión llingüística que carecemos n'Asturies, reconociendo asina la so incapacidá pa torgar un procesu de reivindicación y recuperación llingüística socialmente imparable.