Andecha Astur considera que la nueva normativa de pesca ye insuficiente pa protexer el salmón asturianu yá que, pesie a les restriciones nel periodu captures con muerte y nel cupu captures por pescador, nun s’afronten les principales amenacies la especie: furtivismo, contaminación de les agues, accesos a los llugares de desove, pesca n’agues marines, insuficiente conocimiento sol ciclu de vida la especie... Una vegada más el Gobiernu’l Principau reacciona tarde y mal.

Lloñe quedaren los años 60 y les protestes los mineros pol escesu salmón nel menú. Va yá delles décades que los datos de captures de salmón nos ríos asturianos alerten so la pelligrosa situación del salmón n’Asturies y amás, fai décades tamién que dixebraes organizaciones conservacionistes vienen esmoleciéndose n’alertar y concienciar so los problemes que sufre’l mediuambiente asturianu y en concreto'l mediu fluvial, agredíu especialmente polos asentamientos humanos, infraestructures, aprofitamientos industriales, agrícolas, furtivismu, etc. Pero ye agora, cuando la reduición de captures algama un valor allarmante (356 salmones en 2009), cuando'l Gobiernu’l Principáu plantea restrinxir periodu y cupu de captures de salmón.

Dende Andecha Astur tamos d’alcuerdu qu’hai de restrinxir el periodu y el cupu captures de salmón y habría d’habese fecho enantes, pero nun sólo hai que facer esto, ya que na práutica, al nun esistir una xixilancia ambiental qu’evite'l furtivismu nun sedrá posible reducir les captures de salmón. Amás habríamos de preocupanos por garantizar los derechos d’usu y esplotación tradicionales de la población que vive a pie de ríu y concilialos colos intereses de la pesca deportiva y de conservación. Para poder enfrentar estos problemas necesitase facer una revisión fondera de la llexislación y dotar de medios humanos y materiales a la guardería forestal del Principáu si queremos que puean facer una xixilancia ambiental eficaz.

Per otra parte, Andecha Astur pensamos que la captura y subasta’l campanu pue siguir realizándose axustando les fechas al periodu de captura con muerte y a naide debiere pasase-y pela testera que los intereses de seutores determinaos puean anteponese a la viabilidá la población de salmones asturianos.

 Dicho esto, tenemos d’añadir que nun son los pescaores con llicencia y que cumplen les normatives (la mayoría los pescadores) los cimeros enemigos del salmón, sinon seguru ye más problema la pesca nel mar pala cuala nun se ta faciendo nada. En realidá, son más bien los gobernantes y les sos polítiques desarrollistes y productivistes caracterizaes per una nula o escasa visión de conxuntu y de futuru, los qu’amenacien al salmón ya otros recursos naturales vitales pal caltenimientu les poblaciones humanes. Y esto nun ye nuevo n’Asturies nin nel restu’l mundiu.

Pa que nos ríos asturianos siga habiendo salmones, hai d’encarar el conxunto les amenacies a que s’enfrenten, necesitase que los salmones puean volver del mar a los ríos y que les agues los ríos recuperen la so calidá. Ello implica conciliar los dixebraos usos los ríos: ociu, pesca, deporte y de les sos agues: consumu humanu, regadío, consumu animal… y tamien afondar nos conocimientos sobre la especie y sobre cuestiones ambientales relacionaes. Hai que dexar d’usar los ríos comu alcantarielles y vertederos, hai que xixilar que los colleutores esistan y s’usen, que les depuraores esistan y s’usen, disponer de datos ambientales y téunicos pa interpretalos... En definitiva, ye necesario que’l Gobiernu’l Principáu ellabore un plan de recuperación del salmón seriu y riguroso, basáu nel conocimientu científicu y dotáu de medios y presupuestos, la propaganda o les supuestes “bones intenciones” nun basten pa salvar los salmones anque quizás si puean bastar p’asegurar los “puestinos y les perres” los gobernantes.