Énte’l pieslle de la fábrica de Chupa Chups en Villamayor (Piloña), anunciáu pola empresa propietaria de la mesma (la multinacional italo-holandesa Perfetti Van Melle) pal prósimu 1 de setiembre, la organización política Andecha Astur quier treslladar públicamente a los y les trabayadores de la mesma la so solidariedá, asina comu la so dimposición de sofitar toes aquelles movilizaciones qu’entamen pa la defensa de los sos puestos de trabayu.

Pa esta organización política la perda de 120 puestos de trabayu fixos, a los qu’hai d’amestar otros 180 temporales n’époques de mayor producción, supón un auténticu escalabru llaboral, económicu y social nun sólo pal conceyu Piloña (nel que la falta d’espectatives llaborales, xunío al avieyamientu de la vecindá, ta faciendo que quede despobláu dafechu), sinón tamién pa la fastera centru-oriental del país, d’au proceden munchos de los trabayadores de la fábrica piloñesa.

Andecha Astur camienta que, si a la fin se llega a pesllar Chupa Chups, la responsabilidá nun sedrá sólo de Perfetti Van Melle sinón tamién del Gobiernu’l “Principado”, por apurrir nel so intre ayudes públiques, en concreto pa l’ampliación de la fábrica, y nun facer cumplir a la empresa propietaria los compromisos alquiríos de caltenimientu de la producción en Villamayor. Por desgracia, esti casu, el pieslle o’l amenorgamientu de les plantíes de trabayadores d’empreses multinacionales asitiaes n’Asturies tres recibir bayuroses subvenciones del “Principado”, nun ye nuevu, pasó y siguirá pasando mientres se caltenga nel poder un Gobiernu “títere” manexáu dende Madrid.