Los entamos idiolóxicos y políticos –nomaos mínimos– d’Andecha Astur son los que vienen darréu: 

1. Asturies ye una xunidá xeográfica, política, hestórica, social, cultural y llingüística, que la conforma comu un país estremáu, ello ye, una nación.
   
2.  A Asturies, comu comunidá nacional, asíste-y el drechu inalienable, permanente ya irrenunciable al so llibre autodetermín; al Pueblu Asturianu asíste-y el drechu a decidir por sigo mesmu’l so modelu social, económicu, políticu, cultural y llingüísticu y a encadarmar comu-y pete les sos rellaciones colos pueblos y estaos que lu arrodien. El drechu al autodetermín d’Asturies tien de tar garantizáu por entamu democráticu, tamién pol Estáu español.
   
3. Comu basa de toa nación, Asturies tien drechu a la so integridá territorial y a una organización política común pa tolos sos territorios hestóricos.
   
4. Ensin la capacidá’l Pueblu Asturianu pa comunicase nel so propiu idioma, enxamás nun algamará la so braera identidá. Soberanía asturiana quier dicir tamién que la llingua asturiana –coles sos variedaes llingüístiques– tien de ser recuperada por tolos asturianos y asturianes porque ye un padrimoniu de tol Pueblu Asturianu.
   
5. La soberanía y l’autodetermín del Pueblu Asturianu y de les sos istituciones pasen por recuperar la capacidá y el poder políticu afayaízu pa garantizar la recostruición d’Asturies en toles estayes: la economía, la cultura, lo social, lo llaboral, lo político, la llingua, la hestoria, yaeso, ensin dependencies nin enxerencies nin imposiciones, y disponiendo de tola capacidá de representación direuta y soberana en tolos foros ya istituciones internacionales.
   
6.  La inxusta rialidá na que s’atopa la sociedá asturiana fai preciso algamar un sistema más xustu y llibre onde les clas populares y trabayadores protagonicen una fonda tresformación que les empobine haza’l so progresu nuna sociedá socialista, igualitaria, non sesista, desmilitarizada, ecolóxica y con especial precuru haza los seutores qu’anguañu s’atopen marxinaos o amenorgaos.
   
7. Andecha Astur tien d’implicase activamente na defensa ecolóxica d’Asturies, lluchando pola recuperanza del mediu ambiente y diendo a la escontra dafechu de cualesquier sistema productivu sofitáu na esplotación irracional de la ñatura, del xorrecimientu cuantitativu de la produición col únicu finxu d’acumular beneficios económicos y del fomentu del consumu escomanáu. Andecha Astur puxará poles tribes de trabayu y produición sofitaes nel respetu de los valores ñaturales y paisaxísticos, la renovabilidá de los recursos ñaturales y el caltenimientu de la calidá de vida comu padrimoniu a tresmitir a les futures xeneraciones.
   
8.  Andecha Astur tará siempre a la escontra de los entamos patriarcales, sesites y machistes qu’ispiren esta sociedá y comprométese a trabayar por una sociedá na que tean desanicies dafechu la marxinación y la opresión que carecen güei les muyeres.
   
9. Andecha Astur sopeléxase antimilitarista y atalanta un futuru ensin guerres, onde los exércitos nun tengan xacíu nin hebia sitiu pa opresores.
   
10. Andecha Astur sopeléxase solidaria colos drechos y llibertaes individuales y colleutives recoyíes nes estremaes Declaraciones de Drechos Humanos y de los Pueblos, y ye una organización internacionaliega qu’afita la so solidaridá con tolos Pueblos de la Tierra, mui especialmente coles naciones ensin Estáu y los países que tan siendo espoliaos.
    
11.  Andecha Astur sopelexa’l respetu a les estremaes tribes de rellación afeutiva y sesual y el reconocimientu llegal de cualesquier situación de convivencia social afeutiva a efeutos d’exercer y esfrutar de los mesmos drechos que les presones heterosesuales.