La organización política Andecha Astur ta acabante de pidir a la Conseyería de Salú y Servicios Sanitarios del “Principáu” d’Asturies la puesta en furrulamientu del dimpositivu de Rayos X qu’esiste nel Centru de Salú de Llanes y que lleva paráu dende que s’instalare, va diecisiete años. Un dimpositivu del que nun tien falta de facese cargu nengún radiólogu, porque ta preparáu pa coneutalu direutamente col Hespital Grande Covián al traviés de les nueves teunoloxíes, polo que ye más incomprensible entá que siga ensin furrular.

 

La so puesta en marcha supondría que munchos vecinos y vecines de Llanes y de los conceyos de la so redolada, comu Ribedeva, Peñamellera Alta o Peñamellera Baxa, nun tendrían que desplazase hasta Les Arriondes pa facer unes cencielles radiografíes o otru tipu de prebes. Amás, desconxestionaría’l serviciu nel Grande Covián, saturáu pol avieyamientu de la población nel oriente d’Asturies y que se torna en más tiempu d’espera pa facer les prebes, primero, y pa obtener los resultaos, dempués.El pidimientu d’esta organización política vien a sumase al d’otros coleutivos, casu de l’Asociación de Vecinos La H.oguera, de Celoriu (Llanes), que yá presentó quexes énte dellos organismos ya instancies, comu la Procuradora Xeneral d’Asturies, y qu’amás abrió un espaciu n’internet, na rede social Facebook, pa sofitar la so reivindicación y que yá cunta con más de 600 apoyos.D’otra miente, Andecha Astur quier aprovechar esti comunicáu pa denunciar, otra vuelta, la mala xestión que sufre Asturies en materia sanitario. Casos comu’l de Llanes son la preba de la desatención que sufren les fasteres occidental y oriental del país, nes que rescampla l’ausencia de dellos servicios sanitarios y d’atención básicos, y de la centralización de los mesmos n’Uviéu, dalgo que se verá nidiamente cuandu s’abra l’Hespital Universitariu Central d’Asturies, un edificiu que ye tamién preba d’esa mala xestión del Gobiernu asturianu na estaya que mos ocupa, ya que va cuntar con menos cames que’l qu’esiste anguañu na capital asturiana y, enriba, la so construcción yá acarreta un sobrecostu de cientos de millones d’euros.