Énte los acabantes vertíos na ría Villaviciosa Andecha Astur desixe al Ayuntamientu actuaciones imediates

L’Ayuntamientu Villaviciosa tien de perseguir activamente estos vertíos contaminantes, sacántenes que pretenda convertise en cómpliz de los mesmos; y acometer perurxentemente les obres de saneamientu pendientes.

　Andecha Astur desixe al Ayuntamientu Villaviciosa que se presone comu parte interesao na denuncia presentada pola Cordinaora Ecoloxista énte’l "Principado" y la Confederación Hidrográfica del Norte por un nueu vertíu d’una sustancia contaminante producíu’l pasáu sábadu na ría Villaviciosa, procedente de la fastera d’Albandi.

Andecha Astur considera al Ayuntamientu ún de los cimeros responsables de la situación xenerada na rïa Villaviciosa, que lleva meses zarrada al marisquéu pola so ellevada contaminación microbiolóxica y onde nun paez tomase denguna triba de midíes, col agravante de que la futura ampliación de l’actual depuraora nun contempla’l tratamientu de los vertíos industriales nin urbanos que se producen nel Salín.

Énte esta situación,lo menos que pue facer l’ayuntamientu maliayu ye perseguir activamente estos vertíos contaminantes,sacántenes que pretenda apaecer comu cómpliz de los mesmos, y acomenter les obres de saneamientu pendientes y que tienen paralizaes per agora tantu’l "Principado" comu dichu ayuntamientu.