Los medios de comunicación estatales, a diferencia de la prensa asturiano ya internacional, optaren pol apagón informativu nun entamu y pola criminalización direuta agora.

Llama a la fuelga activa convocada pa esti llunes 18 y reitera la necesidá d’una fuelga xeneral a nivel nacional.

　Andecha Astur denuncia cómu se pasó d’un apagón informativu pal conflictu mineru asturianu a nivel estatal, a una criminalización direuta na que s’obvien les causes del conflictu pa centrase n’aquellos aspeutos de la movilización que resulten más interesantes pa los sos oxetivos de criminalización, fasta’l puntu de calificar les movilizaciones en defensa de la minería asturiano comu terrorismu.

A diferiencia de la prensa asturiano que supo caltener un nivel informativu peraltu y una oxetividá aceutable, ya inclusu de la prensa internacional, onde’l conflictu mineru asturianu ocupó portaes (The Washington Post, USA Today…) y recibió un tratamientu respetuosu, la prensa española ponse al serviciu del Estáu pa terxiversar un conflictu y criminalizar a la parte más feble del mesmu.

Resulta nidiu’l cambiu recién d’estratexa, perfechamente programáu dende’l propiu Estáu español, cola que se pretende aisllar el conflictu y criminalizalu pa que perda’l sofitu social col que cunta.

Sinificativamente, la información que se tresmite a nivel estatal failo básicamente al traviés d’internet, pola prensa asturiano y sobro manera poles redes sociales (Twiter, Facebook…) con curiosa similitú a lo que vien ocurriendo en países que se consideren "non democráticos"

Andecha Astur fai un llamamientu a tolos seutores sociales a rializar un esfuerzu pa superar esta censura al empar que fai un llamamientu a la participación activo na fuelga convocada pal prósimu llunes 18 y reitera la necesidá d’una fuelga xeneral a nivel de toa Asturies, superando la conceición seutorial qu’interesadamene pretende dase al conflictu.