Tres l'ésitu de la Fuelga Xeneral nes cuenques mineres, Andecha Astur entama una campaña pidiendo una Fuelga Xeneral d'Ámbetu Nacional.

Una vuelta pasada la trunfal xornada de fuelga nes cuenques mineres Andecha Astur reitera la necesidá d’una convocatoria de Fuelga Xeneral d’ámbetu nacional, atalantando que ye imposible disociar l’actual conflictu na minería del restu conflictos socio llaborales que tan teniendo llugar n’Asturies nin de la ellevadísima tasa de paru, perda de prestaciones sociales y de la sangría que suponen les decenes de miles d’asturianos que se ven forciaos a emigrar. 

Ello ansina, Andecha vien d’entamar una campaña pública nesi sen, baso’l llema “YE ASTURIES. Non solo la minería, Fuelga Xeneral” que xuncirá al d’ASTURIES NUN SE RINDE col que se reivindica la xunidá de toles lluches que se dan nel nuesu país. La campaña cuntará con diversu material: cartelos, pegatines, trípticos, chapes… aconceyamientos con organizaciones asturianes pa desplica-yos la propuesta d’Andecha Astur, presencia nes redes sociales, actos políticos y dalguna sospresa que dirá dándose a conocer.  

P’Andecha Astur, el llendar el conflictu a les cuenques mineres, comu fain UGT y CCOO, seutorializa la llucha a niveles inaceutables, lo qu’en postrer estremu favorez l’aisllacionismu del conflictu mineru y debilita la llucha obrera nel nues país, al facer de ca conflictu un casu aislláu y ñegar la evidencia d’una confrontación d’intereses a nivel nacional por unos fechos que, si bien ye cierto que se producen dientru d’un contestu internacional, n’Asturies alquier formes propies, non en vanu vienen dándose dende munchu enantes de la cris d’anguañu y respuende a unes polítiques mui concretes del Estáu español p’Asturies empobinaes a l’esaniciu del nuesu texíu económicu, col oxetivu d’algamar la desindustrialización dafechu del nuesu país, la emigración de la nuesa mocedá y un futuru basáu en xubilaos y camareros.

Pa participar na campaña Esta direición elleutrónica ta curiada escontra spam bots. Precisa activase JavaScript para vela