El nueu estudiu d’Eurostat confirma l’incrementu del desemplegu de la mocedá asturiana y pon a Asturies de cabezalera a nivel européu. 

Talo comu vien denunciando Andecha Astur, la política española aplicada n’Asturies tien a la mocedá asturiana comu principal víctima, de tala miente que non solo costitúin el mayor porcentaxe de los miles d’asturianos obligaos a emigrar añu ente añu, sinon que énte los que tovía resisten n’Asturies sigue xorreciendo’l desemplegu, siendo asina que nel 2011 Asturies yá s’afaya ente les 15 rexones europees con mayor tasa de desemplegu de la mocedá.

L’estudiu divulgáu pola oficina europea d’estadística (Eurostat) espeya un nivel de desemplegu xuvenil del 49,1%, lo que coloca al nuesu país nel decimocuartu territoriu con más mocedá en paru de los 271 que conformen el mapa rexonal de la Xunión Europa (XE), colo que nun solu añu Asturies esguiló seyes posiciones, duplicando la media de paru européu ente la mocedá (21,4%).

Andecha Astur va años que vien denunciando esta evidencia y desixendo del Estáu español y los sos cómplices del “Principado” la fin de la so política d’esfarrapamientu económicu y esaniciu social que vien prauticando n’Asturies, que non solo obliga a miles y miles d’asturianos a emigrar del so país, sinon que caltién al restu nuna situación de precariedá social y llaboral inaceutable.