Andecha Astur acusa al "Principado" de tibieza con HC y d’intentar embrivir el vertíu

Participará en la Concentración contra el vertido de galipote que se realizará mañana en Candás

Andecha Astur considera que’l tratu dáu pol "Principado" a HC na cris xenerada pol vertíu de 10 tonelaes de galipote’l pasáu 26 de xunu ye d’una tibieza estrema, tantu no que se refier a les declaraciones rializaes polos responsables del mesmu comu poles midíes llegales adoptaes fasta la fecha y que se llinden a un espediente sancionador, mentes que HC, a díi de güei, nin siquier ellaboró’l programa de recuperación y restauración ambiental al que ta obligada.

Andecha Astur entiende que dichu comportamientu ta marcáu polos patéticos intentos del "Principado" por embrivir la trescendencia del vertíu y pol fechu de que l’actual conseyera de Fomentu, Ordenanza del Territoriu y Mediu Ambiente, Belén Fernández, foi quien concedió l’autorización medioambiental a la central térmica d’Aboño n’abril de 2008 cuandu yera conseyera de Mediu Ambiente y Desendolcu Rural col Executivu d’Areces,nun procesu con sospeches de fraude y fuertemente criticáu por tenese realizao en bas namás a los informes de los téunicos de la mesma compañía.

Asina mesmu, hai de resaltar que HC (propietaria de la central d’Aboño), ta presidía por Manuel Menéndez (que tamién preside Cajastur), y que foi upáu a dicha presidencia pol PSOE en Asturies, con especial intervención de Trevín y Villa.

Per otra parte, Andecha Ástur quier remembrar que dende va años vien denunciándose que la central térmica d’Aboño ye una de les térmiques más contaminantes de la Europa ocidental, y qu’en repitíes ocasiones alvirtiérase de la posibilidá de que daes les carauterístiques de la mesma, pudieren producise estos vertíos.

Nel mesmu sen, Andecha Astur amiéstase a la Concentración escontra los vertíos convocada pa esti sábadu 7 de xunetu a les 13 hores en Candás .