El Delegáu del gobiernu español n'Asturies vien d'emitir un "Comunicáu Urxente" nel que criminaliza la llucha minera y menacia con más represión.

Talo comu Andecha Astur denunciara, el procesu de criminalización de la llucha minera va xorreciendo progresiblemente, y si yá yera nidio comu los medios de comunicación ca vuelta tracamundiaben más la rialidá, y les direiciones sindicales diben separtándose de los aspeutos más comprometíos de la llucha, agora Gabino de Lorenzo, Delegáu del gobiernu español n'Asturies vien d'emitir un "Comunicáu Urxente" nel que falsia la rialidá falando de "actos de violencia protagonizados por grupos de mineros que han tenido como consecuencia el ingreso de dos personas completamente ajenas al conflicto.." pa finar menaciando con que "las fuerzas de orden público actuarán con toda firmeza en cada caso".

Dientru la so dinámica de criminalización del conflictu mineru, Gabino de Lorezo evita reconocer que la violencia exércela l'Estáu español al qu'elli representa, per un llau ñegando'l futuru de la minería y per otru cola actuación de les sos fuercies represives pa controlar la llóxica rempuesta del Pueblu Asturianu a esta nuea agresión.

Asina mesmo, hai que perafitar que los feríos a los que fai referencia el representante español fuéronlo comu consecuencia de la xabaz toma militar de La Pola L.lena pola Guarcia Civil qu'actuó sistemática ya indiscriminadamente escontra los vecinos.

Ello asina, Andecha Astur torna a facer un llamamientu a la sociedá asturiano a asumir la llucha minera comu una parte más del conflictu esistente ente Asturies y l'Estáu español, propón la convocatoria d'una Fuelga Xeneral d'ámbetu nacional y alvierte escontra los intentos de criminalización de la llucha, y la conocía tendencia de les direiciones sindicales del SOMA y CCOO a pautar alcuerdos contrarios a los intereses de los trabayaores y d'Asturies, n'esficies de los sos propios porgüeyos.