Baltar edificios emblemáticos de la ciudá nun tien denguna xustificación salvo siguir el cercu del urbanismu especulador y destructivu de los últimos gobiernos PSOE-IU.

Andecha Astur pide a Foru que nun descatalogue los trés edificios de principios del sieglu XX con mires al so valtamientu y nun siga’l cercu del urbanismu especulador y destructivu que dexó’l PSOE. Que nun se plega, comu fixeron les corporaciones de PSOE-IU demientres décades, a la voracidá especuladora d’unos pocos y qu’encete un plan de rehabilitación pa los emblemáticos edificios de la cai Xovellanos qu’entá siguen de pies.

Mentes en toa Europa’l modelu urbanísticu foi y sigue siendo la recuperación y rehabilitación del patrimoniu arquiteutónicu, en Xixón, con décades de gobiernos llocales del PSOE-Iu siguió’l gafíu modelu de destruición y especulación que güei tamos sufriendo. Ye tan paradigmáticu’l casu del urbanismu caóticu de la nuesa ciudá que s’estudia nes escueles y facultaes d’arquiteutura como exemplu a evitar.

Andecha Astur pide a Foru que ruempa’l círculu viciosu d’especulación-corrupción, que ye’l modelu urbanísticu imperante fasta l’entamu de la cris y una de les principales causes d’ella, y que demuese que Xixón ye una ciudá moderna, culta y europea que curia y respeta el so patrimoniu histórico y urbanístico.