La escuela pública n’Asturies ta en pelligru. Y na primer llínia de defensa tán los mayestros/es y profesores, en fuelga. Lluchen, pola estabilidá llaboral, pola igualdá d’oportunidaes y pola supervivencia d’una educación pública asturiana. Lluchen tamién por tola comunidá escolar. Lluchen, a la fin, por Asturies.
El Gobiernu del ‘Principado’, cola Conseyera d’Educación Lydia Espina a la cabeza, lleva tiempu aplicando una política antisocial y regresiva, contraria a los trabayaores de la enseñanza y más cercana a los intereses de les patronales de la enseñanza privada que a les necesidaes de les escueles públiques asturianes.
Dende Andecha Astur queremos manifestar tol nuesu sofitu a la Escuela Pública Asturiana y denunciamos
- La cronificación de la precariedá docente, con una interinidá abusiva, concursos d’estabilización inxustos y un sistema que desprecia la esperiencia y l’enraigonamientu d’esti profesoráu.
- Una Conseyera y un ‘Principado’ que nun dialoguen, que desprecien les aiciones sindicales y que respuenden a la fuelga con desplantes y propaganda, nunca con soluciones reales.
- La continuidá de conciertos con centros privaos mientres se recorten medios na pública, cerrando unidaes en zones rurales, masificando aules y sobrocargando plantiyes.
- La negativa reiterada a garantizar l’asturianu como llingua vehicular, nun exerciciu de despreciu a los derechos llingüísticos del Pueblu Asturianu.
- Una política de xéneru y d’inclusión estancada, incapaz de dar rempuesta a les necesidaes del alumnáu más vulnerabilizáu.
Ello asina, dende Andecha Astur sofitamos y facemos nuesa la fuelga docente
Porque la fuelga de los mayestros/es y profesores nun ye solo polos sos llexítimos drechos ya intereses llaborales.
Ye tamién por unes escueles que funcionen, por una formación de calidá pa la mocedá, pola xusticia llaboral y por una democracia real nel sistema educativu.
Ye por una Asturies que nun se rinda al mercáu nin al despreciu cultural.
Y desiximos
- Resolución inmediata del conflictu, atendiendo les reivindicaciones llaborales del colectivu docente y poniendo fin a la precariedá.
- Un compromisu firme cola Escuela Pública Asturiana, con presupuestos suficientes, claros, inversiones reales y planificación a llargu plazu.
- Asturianu vehicular y oficial, como elementu integrador, non como ornamentu opcional.
- Diálogu real, non simulacros, con los sindicatos, y con tola comunidá educativa
- Dimisión de la Conseyera vista la so incapacidá pal diálogu y la falta de voluntá política de defender la Escuela Pública Asturiana.
