Andecha Astur entama una recoyía firmes pola moratoria eólica n’Asturies

 Pídese un nueu marcu normativu, aparar los planes d’eólica marítima y un Plan Enerxéticu previu p’Asturies

Andecha Astur acaba poner en marcha una campaña de recoyía firmes en Change.org pa sofitar el so pidíu d’una moratoria n’Asturies en materia d’esplotación d’enerxía eólica terrestre, eólica marítima y fotovoltaica.

Na web de la campaña úfrese un documentu nel que se xustifica ampliamente la necesidá d’esa moratoria. Pero, en resume, son tres les razones principales poles qu’esa midía resulta necesaria:

1. Asturies nun tien un marcu normativu que, ensin concesiones a los intereses del oligopoliu enerxéticu, asegure’l caltenimientu de los escosistemes y la biodiversidá, la proteición del paisax, del padremuñu hestóricu, cultural y arqueolóxicu, de les actividaes del seutor primariu y, en xeneral, del mou de vida de l’Asturies rural. Y nun queremos que les enerxíes renovables seyan un motivu más pal abandonu forciáu de los nuesos pueblos.
2. Asturies tien drechu a un debate social y a que se negocie l’apertura de fasteres eóliques marítimes col seutor pesqueru. Y, por supuestu, ye mester que se modifique’l BOE que sitúa les fasteres eóliques marítimes asturianes dientru de reserves pal caltenimientu de la biodiversidá marina.
3. Enantes de llevar alantre cualisquier política enerxética, Asturies tien de disponer d’un Plan Estratéxicu de Recursos y Necesidaes Enerxétiques, que determine recursos, necesidaes y la combinación de formes de produción enerxética que mos convién.

Mentantu nun dispongamos d’una nuea normativa, nun s’aparen los planes d’eólica marítima y nun se tenga un Plan Enerxéticu p’Asturies, la moratoria ye la midía más prudente y aconseyable.

Por esa Asturies meyor pola que trabayamos, participa cola to firma nesta campaña.

RECOYÍA FIRMES POLA MORATORIA EÓLICA N’ASTURIES