Andecha Astur quier manifestar el so rechazu abosoltu a l’autorización pa la istalación 148 contenedores de bateríes d’altu riesgu n’Uviéu
L’autorización del ‘Principado’ a la conexón de 148 contendores de bateríes ensin participación ciudadana nin evaluación ambiental rigurosa ye un exemplu más de lo que supón la mal llamada “transición enerxética” impuesta dende Madrid: una estratexa al serviciu de grandes corporaciones, que convierte Asturies nun apéndiz industrial y nun territoriu de sacrificiu.
Estos contenedores —en realidá grandes bateríes estacionaries pa almacenar enerxía— instálense non pa favorecer l’autoconsumu nin la soberanía enerxética, sinón pa garantizar el negociu de les empreses que controlen los macroparques eólicos y solares del Estáu. La enerxía que se va almacenar nun ye pa les families asturianes, nin pa la pequeña industria, nin pal texíu llocal, sinón pa ser vendío al mejor postor nel mercáu estatal o europeo.
Amás, estos contenedores acarreten consigo riesgos ambientales, tóxicos y de seguranza: llitiu, cobaltu, sobrocalentamientos, pelligru d’incendios, emisiones en casu de fugues… Y, como siempres, van quedar nel nuesu territoriu, ensin beneficios sociales nin económicos reales pal país.
Ye intolerable que s’impongan instalaciones industriales d’esta magnitú ensin consultar al pueblu, ensin un debate públicu, ensin que los conceyos afectados —nesti casu, Uviéu— puedan decidir soberanamente sobro’l so territoriu. ¿Cuántos puestos de trabayu van xenerar estos contenedores? ¿Qué beneficios va tener la vecindá d’Uviéu? ¿Qué control vamos tener sobro la enerxía almacenada? La respuesta ye clara: dengún.
Andecha Astur denuncia qu’esta actuación forma parte d’un procesu más ampliu de recolonización industrial d’Asturies, que repite l’esquema históricu del espoliu: primero fueron el carbón y l’aceru; agora, la enerxía y el paisaxe. Too ello cola complicidá de les instituciones asturianes, más esmolecíes en quedar bien coles multinacionales que col so propiu pueblu.
Reclamamos l’anulación inmediata d’esta autorización, la paralización de les obres, y l’entamu d’un procesu d’información pública, participación vecinal y evaluación independiente. Nun vamos permitir que’l corazón d’Asturies se convierta nun contenedor tóxicu al serviciu de la “España verde” y el capital enerxéticu.
Dende Andecha Astur, reafitámos la nuesa apuesta por una transición enerxética asturiana, democrática, descentralizada, ecolóxica y popular, que protexa’l territoriu, xenerando beneficios pa quien vive nél, y non pa quien vien a estrayelu.
Asturies nun se vende. Asturies defiéndese.
