Andecha Astur denuncia públicamente la postura del Ayuntamientu Xixón nel casu del denomáu monumentu del Simanques, una postura que nun pue xustificase nin como téunica nin como urbanística.
La decisión del Ayuntamientu nun ye neutra. Ye una toma de posición política clara: la defensa d’un símbolu d’esaltación franquista y, polo tanto, l’alliniación col discursu de la estrema derecha española.
Escudase nun catálogu urbanísticu pa impedir la retirada del monumentu supón asumir el marcu ideolóxicu del franquismu sociolóxicu, que considera llexítimo siguir rindiendo homenaxe a los responsables d’un golpe militar y d’una dictadura criminal. Nun hai equidistancia posible: o se defende la memoria democrática o se protexe la herencia del franquismu.
Andecha Astur afirma con claridá que lo que ta en xuegu nun ye una escultura, sinón qué valores se normalicen nel espaciu públicu. Defender la permanencia del Simanques ye defender que la esaltación franquista ye compatible cola democracia. Y eso ye inaceutable.
Esta situación nun ye un fechu aislláu. Tal como recordó la FAMYR, n’Asturies persisten decenes de símbolos franquistes que sobrovivieron ensin problema a décades de gobiernos del PSOE y d’IU, gobiernos que falaron de memoria democrática pero nun aplicaron les lleis cuando tuvieron responsabilidá institucional.
L’ argumentu de que “eso ye historia” ye falsu. Retirar símbolos franquistes nun ye borrar la historia, ye dexar de cellebrala. La historia estúdiese; los monumentos honren. Y el Simanques sigue honrando un réxime criminal.
El contraste con Europa ye nidiu. N’Alemaña, los símbolos nazis tán prohibíos nel espaciu públicu. Naide fala ellí de catalogación nin de proteición patrimonial. La democracia constrúyese sobro un francimientu visible col pasáu totalitariu, non sobro la so normalización.
Cuando’l discursu del Ayuntamientu de Xixón coincide pallabra por pallabra col de VOX, convien dexar de falar de tibieza y llamar a les coses pol so nome: alliniación ideolóxica cola estrema derecha.
Andecha Astur reafirma que la memoria democrática nun se cataloga nin s’aparca. Exercítase.
Y mientres el franquismu siga teniendo monumentos d’honor n’Asturies, la democracia va siguir siendo incompleta.
