Inicio > Sin categoría > 2. Priorizamos la collaboración
Sin categoría

2. Priorizamos la collaboración

ASTURIES NES TOS MANES

2. Priorizamos la collaboración con otres organizaciones polítiques siempres que reconozan Asturies comu’l nuesu marcu de decisión y los nuesos drechos comu nación.

Priorizaremos del mesmu mou les alliances con otros pueblos igualmente sometíos pol Estáu español y otros nel ámbetu européu; faciéndolo dende una conceición solidaria ya internacionalista de la llucha pola soberanía, la llibertá, la democracia popular y la xusticia social.

 

VER RESTU PROPUESTES 

 

4 thoughts on “2. Priorizamos la collaboración

  1. Sergio

    Hola, llámome Sergio

    Sois el partíu col que más me identifico y que meyor representa les mis idees, pero solo vos voté pal senáu. Pal congresu nun me quedó más remediu que votar lo más parecío a un partíu «asturianista» qu’atopé na papeleta: podemos-izquierda xunida-equo.

    Yo soy un d’esos que pensó nel «votu útil». Muncha xente lo fizo. Ta muy bien que collaboréis con fuercies nacionalistes catalanes, vasques o gallegues y nun soy yo naide pa dabos conseyos, pero polo que yo vos escribo ye porque me llama la atención que nun haya sío posible n’Asturies poner d’alcuerdu a tolos partíos asturianistes pa formar una coallición que xenere ilusión ente aquellos que nun mos sentimos representaos por sucursales de los partíos de Madrid, que yo creo ye el casu de más xente de la que pensamos.

    Lo que quiero ye animabos a buscar un alcuerdu colos demás partíos asturianos. Por desgracia yo creo que por separao nun vais sacar nunca ná nin los unos nin los otros. Los asturianos merecemos d’una vegada una coallición asturiana que mos represente como mínimu nel parllamentu asturianu. Creo que ye la única manera de facer frente a Foro y Podemos.

    Polo tanto la mío propuesta ye esta, que pongáis el mayor enfotu en xuntar a toles fuercies nacionalistes y rexonalistes superando rencilles internes. Nun me creo que seya imposible, tien de poder facese. Podemos coyer como exemplu el BNG, Coalición Canaria o la Chunta Aragonesista. Pero si ye que fasta el partíu rexonalista cántabru sacó un escañu.

    Gracies y ánimo.

    • andecha

      Hola Sergio.
      Lo primero agradecete que te punxeres en contautu con nós.

      Nun somos a entender lo del «votu útil», pero entendemos qu’esa ye una opción presonal sobro la que nun tenemos un res que dicir.

      N’otru sen, no que fales de «poner d’alcuerdu a tolos partíos asturianistes» decite que sí, que yá ta fecho, que llamentablemente nestos intres namás esiste n’activo Andecha Astur, y si se quier Foro, qu’anque seya un partíu españolista, ye d’ámbetu asturianu.

      Asina y con ello, dende Andecha Astur tamos faciendo una campaña de «Puntos Mínimos y Frente Ampliu» pa intentar xuncir esfuercios y voluntaes non yá con otros partíos -que nun esisten- pero sí con otros colleutivos y presones a nivel individual, nel comencimientu de que tenemos que ser quien a entendemos ente tolos soberanistes/asturianistes.

      De toes formes agora mesmo el mayor problema que vemos ye cola tolerancia qu’esiste ente esi soberanismu/asturianismu pa coles sucursales madrilanes n’Asturies. Lo que mos cuntabes de votu útil ye l’exemplu perfechu. Mentes nel Congresu andemos polos milenta votos, nel Senáu perpasemos los 5.600 ¿Qué sinifica eso? Qu’hebio muncha xente que fexo’l mesmu analís que ficiste tu.

      ¿Maxines que toa esa xente que mos votó al Senáu mos votara al Congresu? Agora mesmo taríemos falando de sacar un diputáu na Xunta Xeneral…

      Bono, reiterate l’agradecimientu por dirixite a nós, y esperamos cuntar col to sofitu y collaboración pa estes elleiciones nacionales y de conceyu, y pa esa Asturies pola que naguamos: socialista y soberana.

      • Sergio

        La tolerancia pa coles sucursales madrilanes de la que faláis, nel mi casu polo menos y de xuru que en munchos otros casos, nun ye por gustu, votámoslos porque yera «lo menos malo» dientro lo que se ufiertaba. Yo hubiere votao por un partíu de ámbitu asturianu, pero temíame que Andecha diba sacar pocos votos (pal congresu) como asina fue. Muncha xente pensó como yo, por eso vos votó pal senáu y pal congresu (que ye más importante) prefirieron «asegurar». Yo toy seguru que muncha xente non se decide por Andecha polo que vos acabo contar, al final unos por otros y acabamos votando «lo menos malo» y non lo que quedríemos votar de verdá.

        Pero lo mesmo yo creo que pasaba col Partíu Asturianista nel so día. Sobre tou dempués de 2011, cuandu aparecieron n’escena Foro y Podemos. Pa contrarrestar estos dos partíos los asturianistes vamos tener que facer dalgo especial, nun sé como desplicalo, pero agora mesmo la xente da-y más valor al fechu de que’l so votu cuente que al fechu de votar un partíu asturianista de verdá y la mayoría confórmase con ver dalgún rasgu de asturianismu no que voten, anque seyan sucursales de partíos de ámbetu estatal.

        La cuestión yera ponese toos d’alcuerdu pa votar a un partíu asturianista de verdá, o una coallición d’ellos. Entós lo que a mí me paez ye que falla la comunicación ente les fuercies asturianistes y los sos votantes. Hay que alcontrar la manera de llegar más al elleutoráu y tresmiti-yos la sensación de que votar al asturianismu nun ye tirar el votu, que hai posibilidaes riales de sacar representación. Tien que haber dalguna manera de llegar meyor a la xente creando más y meyores canales de comunicación.

        Una manera per bona sedría xunir fuercies o intentar convencer a los antiguos votantes del Partíu Asturianista (yo mesmu fuí votante), de URAS, de Unidá…esa parte del asturianismu ye amplia, pero tienen que ver un proyeutu esperanzaor, sinon van seguir votando a Podemos y a Foro.

        Ye una pena muy grande pa los asturianistas non tener representación nin siquiera nel parllamentu asturianu, sobre tou viendo que fasta los rexonalistes cántabros van tener un escañu nel parllamentu español. Los asturianos siempre tamos a la cola de tou. Dientro pocu fasta los de Tierra Comunera de Castilla mos pasarán por delantre.

        • andecha

          Entiendo perfechamente la to postura, pero nun pueo compartila.

          Si toa esa xente que mos votó al Senáu mos votara al Congresu agora mesmo taríemos falando de sacar un diputáu na Xunta Xeneral… esi supuestu «votu útil» que fai que se vote a sucursales madrilanes nel nuesu país ye’l que ta torgando qu’el soberanismu/asturianismu garre fuercia y puea tar presente nes istituciones.

          Hai que xunir fuercies, y pa eso lo primero ye nun sofitar a quien pretenden faer d’Asturies un barriu de Madrid.

          De toes formes tamos nesa llinia: puntos mínimos y frente ampliu, y de xuru que mos toparemos nesa xera.

Deja un comentario

Tu dirección de correo electrónico no será publicada. Los campos obligatorios están marcados con *