Inicio > Asturies > Contigo nel camín
AsturiesPortada

Contigo nel camín

CONTIGO NEL CAMÍN

 

Reflexones y determinos tres les elleiciones de mayu/2019

 

 

Les elleiciones nacionales, de conceyos y europees cellebraes el caberu 26 de mayu dexen a Asturies en manes de quienes la llevaron a la crisis política, social, económica, demográfica y ética na que s’atopa. El resultáu ye llamentable porque Asturies sigue nes manes de la mafia corrupta que mos gobernó demientres décades. El resultáu ye doliosu porque la responsabilidá politico nel robu y desmantelamientu d’Asturies nun tuvo un costu nes urnes.

Ello foi posible porque’l PSOE goció en tou momentu d’una complicidá activo: la d’aquellos que, comu IU y Podemos, nunca apostaron por fiscalizar y denunciar la corrupción, nin en facer d’ello una llínia roxa de sobrevivencia democrática. Los qu’aportaron a les istituciones prometiendo auditoríes de calidá democrático y anticorrupción finaron aprebándo-y gratis los presupuestos al PSOE de Javier Fernández, participando y/o calteniendo gobiernos del PSOE o Foro en dalgunos conceyos. Estes organizaciones collaboracionistes pautaron colos corruptos y aidáronlos a blanquiar les sos responsabilidaes polítiques y a tapecer les posibles responsabilidaes penales. Esa ye ñidiamente la ubicación política de la esquierda española: unos na corrupción, otros nel collaboracionismu que la blanquea.

En tou casu, l’analís d’unes elleiciones tien de centrase tamién na valoración de los propios resultaos. Nesti sen, pesia ser coscientes de la rialidá na que mos asitiamos y valorar perpositivamente l’importante xorrecimientu en númberu votos, reconocemos que los nuesos resultaos nestes elleciones nacionales, de conceyos y europees foron insuficientes. Insuficientes, ensin más. Insuficientes pa defender con seguranza los drechos políticos del Pueblu Asturianu énte los intereses del Estáu español y el capitalismu xabaz. Insuficientes pa facer d’Asturies un marcu d’actuación propiu necesariamente reconocíu poles demás fuercies polítiques.

Persabemos cuála ye la rialidá política asturiana d’esta dómina y, más concretamente, la de la so espresión nacionaliega. Nun son tiempos de compromisu abondosu en militancia político, sinón más bien d’estancia acomodaticio nos cuarteles d’iviernu, cuando non de rebusca de soluciones/porgüeyos presonales, perriba la mínima coherencia.

Precisamente porque somos bien coscientes d’ónde veníemos, reconocemos l’esfuerciu descomanáu de la militancia d’Andecha Astur y los sos simpatizantes, que, en tiempos difíciles, comprometiéronse cola organización pa permitir la ellaboración d’un programa elleutoral, d’unes candidatures y d’una campaña de visibilización amplia.

Pero nun ye la nuesa voluntá conformamos con esta situación. Porque la vocación d’Andecha Astur ye la de ser un preséu común pa tresformar la rialidá, algamando l’Asturies soberana que mos pruye faciendo tamién una xera alternativo dende les istituciones.

Lo mesmo que reconocemos que nun foron los nuesos unos resultaos suficientes, tamién mos decatamos de que foron interesantes. Interesantes porque l’esfuerciu la militancia y la resistencia firme de la organización permitió que los votantes asturianos tuvieren n’Andecha Astur una opción nacional, la única, pa espresar la so voluntá político. Si nun fore por ello, n’Asturies sólo podríen dase nes urnes rempuestes españoles. Porque ta claro que, lo mesmo nel ámbetu la drecha que nel de la esquierda, Andecha Astur foi nestes elleiciones la referencia asturiana, la única opción que reconocía Asturies comu nación y marcu específicu d’aición político. Vemos nello un valor de presente y con futuru, porque mos permite presentamos comu lo que somos: un referente hestóricu d’organización nacional abierta, una ferramienta popular pa la tresformación de la rialidá y l’algame d’una Asturies soberana y socialista. Y nesta convocatoria elleutoral perviose que, mesmamente nes piores circustancies, esa opción que representamos tien una base de votu seguru, cola calidá de ser fiel, comprometíu y ayenu a los condicionamientos circustanciales del contestu español.

Foron unos resultaos insuficientes, pero interesantes porque, atopándose’l movimientu nacional asturianu nún de los momentos más febles de la so hestoria, Andecha Astur llogró que nestes elleiciones fore visible tovía una opción asturiana, la única qu’hebio. Y algamólo ellaborando con calces participativos un programa políticu propiu pal país, posicionándomos ñidiamente sobro munches custiones básiques más allá del conflictu llingüisticu que carecemos, dedicando grandes esfuercios a una campaña elleutoral mui activa na cai y nes redes sociales, y aprofitando la impagable disposición de la nuesa candidata nacional a participar en cualisquier foru d’alderique onde fuimos convitaos.

De la esperiencia d’estos meses, convién recoyer la conclusión de que tenemos d’entamar a preparar los procesos elleutorales con muncha más anticipación temporal, tanto no que cinca a la definición del programa políticu, comu a la ellaboración de candidatures y puesta en marcha de los equipos de trabayu na campaña.

Una anéudota sirve pa ver cómu acertemos ellaborando un programa políticu mediante calces abiertos de participación ciudadano. Esi procesu nomámolu “Asturies nes tos manes”. Califícase solu’l fechu de que Podemos tuviere que copiamos esti llema pa la so campaña elleutoral.

Sicasí, insistimos en que los resultaos, magar qu’interesentes, foron insuficientes. Una de les razones fundamentales foi qu’estes elleiciones nacionales y de conceyu viéronse condicionaes dafechu por un analís en clave española, espresión de la falta de voluntá política de les istituciones asturianes -lléase «Principado»- de xenerar una dinámica nacional asturiana, superando el sucursalismu, servilismu y sumisión al gobiernu central.

Ello asina, la ca vegá más imposible  vertebración del Estáu español y la cellebración recién d’elleiciones pal so congresu y senáu, col resultáu d’una mayoría insuficiente del PSOE, con varies posibilidaes p’apautar una mayoría nel gobiernu madrilanu y cola presencia ñaciente d’otra cara más de la ultradrecha (Vox), condicionaron dafechamente les votaciones pal gobiernu la nuesa nación y los nuesos conceyos. De xuru que si’l momentu políticu del Estáu español fore otru y les sos elleciones se distanciaren más de les nueses, los resultaos de les votaciones n’Asturies sedríen otros estremaos.

Somos coscientes tamién de que les opciones soberanistes asturianes nun puen concurrir anguañu a procesos elleutorales n’igualdá de condiciones coles opciones españoliegues. Y ésti ye un fechu que tien de considerase en cualisquier valoración posterior. L’Estáu español y tolos sos poderes (políticos, económicos, ideolóxicos, bancarios, mediáticos, policiales…) trabayen pa garantizar opciones privilexaes pa les so voces polítiques. Poro, nun ye d’estrañar que Podemos nes anteriores elleciones y Vox néstes, cuntaren con llamativos sofitos táuticos del sistema, que naguaba por afalar la so presencia nel sistema políticu español. Porque Podemos, Vox y otres organizaciones polítiques resulten útiles en dellos momentos pa los porgüeyos del Estáu español, de mou qu’apuesta por ellos utilizándolos comu contrapesos circustanciales del so sistema, pero en tou casu siempres controlaos y manipulables. Pero Andecha Astur nin va prestase enxamás a un xuegu de contrapesos nin pue ser utilizá pa ello,  porque, a la escontra de lo que faen Podemos o IU, custionamos dafechu la esencia y la esistencia del propiu Estáu español y porque mos presentamos a los procesos elleutorales n’asturianu y defendiendo los drechos políticos y llingüísticos de la xente asturiano; poro, la nuesa presencia n’elleiciones siempres cuntará cola oposición activa y decidía de tolos poderes del Estáu español.

D’esti procesu elleutoral sacamos otra conclusión, firme al tiempu que llamentable. Andecha Astur representa la única opción política que tienen les asturianes y asturianos pa defender los sos drechos llingüísticos. Magar que la sentencia que ganemos nel añu 2000 nel Tribunal Costitucional español reconoz el drechu a participar n’asturianu nos procesos elleutorales (presentación de candidatures, papeletes de votu…), denguna organización política, a nun ser nós, fai usu d’esti drechu consiguíu con esfuerciu; naide nun defende na práutica la nuesa llingua nin reconoz los drechos de los nuesos falantes. Nin Podemos, nin IU, nin Foro…, naide más qu’Andecha da amueses indiscutibles de coherencia llingüístico. Lo cualo ye una preba más de que los partíos de drecha y d’esquierda que presenten candidatures n’Asturies nun son más que brazos políticos del Estáu español, de la so llingua imperial y de la so identidá colonizaora.

Otra de les conclusiones d’esti procesu elleutoral ye que confirmamos que foi un aciertu la nuesa incorporación a l’allianza Agora Repúbliques. Nes caberes elleciones españoles sumemos les nueses enerxíes a les d’EH Bildu, Esquerra Republicana, BNG y organizaciones soberanistes aragoneses y canaries; agora ficímoslo igualmente pa presentamos a les elleiciones europees y algamáronse tres eurodiputaos. Camentamos que ye un aciertu xunir los esfuercios d’organizaciones soberanistes, porque mos permite retrucar más eficazmente al Estáu español y a los lobbies de les multinacionales.

La presencia d’Andecha Astur na coallición Agora Repúbliques fadrá posible que les asturianes y asturianos espresen, ensin intermediarios, la so propia voz nes istituciones. Cola nuesa inclusión na coallición, Andecha Astur convirtióse na referencia clara n’Asturies del republicanismu soberanista. Y dende esa posición podremos llevar al Congresu y Senáu españoles y al Parllamentu Européu los pruyimientos d’Asturies y defender los sos intereses, en xuntanza con otres organizaciones que, comu nós, nagüen pola soberanía de los Pueblos y de les clases populares. Tenemos d’aprofitar esta oportunidá pa desendolcar un discursu políticu y unes iniciatives lo más averaes posibles a la sensibilidá qu’amuesa la xente na cai. Si lo facemos asina, nun pasará munchu tiempu ensin que veamos cómu la nuesa integración n’Agora Repúbliques va dar resultaos d’interés pal nuesu país.

Sicasí, decatámosmos de que la nuesa presencia elleutoral nesta coallición tampocu ye que representare un impulsu bultable nos nuesos resultaos nes urnes. Algamenos unos cientos más de votos nes elleiciones europees que nes nacionales. Pero Agora Repúbliques ye, de xuru, el marcu políticu afayaízu nel que tenemos de tar anguañu pa defender la nuesa nación y el nuesu Pueblu fora les nueses llendes.

Nesi sen, abúltamos insuficiente la visibilidá que tien la coallición dientru les istituciones españoles. Apostamos porque toles organizaciones que la componemos reforciemos el compromisu con Agora Repúbliques, fortaleciendo la so presencia formal tanto nel Congresu comu nel Senáu españoles.

Peracabaos tolos procesos elleutorales que tuvimos d’encariar nunos pocos meses, Andecha Astur define la so estratexa inmediata afitándose nes conclusiones que saca de los mesmos. Asina vamos entamar un procesu que podemos calificar comu de refundación. Non porque tengamos d’entamar daqué que nun hai, sinón porque queremos escomencipiar un tiempu nueu centráu na reactivación y fortalecimientu, na acumulación de fuercies, na definición d’un frente ampliu de puntos mínimos pa la defensa la nación y el Pueblu Asturianu.

Esti procesu tien de permitimos revitalizar el papel del y la militante na so participación nos procesos de reflexón y aición político, asina comu reforciar la so vinculación cola organización n’aquelles estayes onde se sienta más útil.

Nesti nueu tiempu Andecha Astur atenderá toles necesidaes propies d’una intervención política global, pero va centrar los sos esfuercios en cuatru aspeutos básicos:

  1. Organización: Fortalecimientu de los calces internos de participación y de les cadarmes de trabayu políticu; afitamientu de la organización comu preséu políticu d’un frente ampliu de puntos mínimos na defensa la nación y el Pueblu Asturianu.

 

  1. Mocedá: Xorrecimientu de la estaya moza de la nuesa organización, con una dinámica propio de formación y aición político.

 

  1. Formación: Aiciones continuaes d’espardimientu de la concenxa nacional asturiana en toles sos estayes ( política, hestórica, económica…).

 

  1. Xera istitucional: Aniciu de grupos de trabayu estables que xestionen les iniciatives de la coallición Agora Repúbliques pa defender los porgüeyos asturianos ente’l Congresu y Senáu españoles y el Parllamentu européu.

 

Con estes reflexones consideramos entamá una nuea dómina. Un tiempu de trabayar más por Asturies. Un tiempu d’axuntar toles manes. Un tiempu de xera y xuntanza pol país. A ello se va dedicar Andecha Astur y prestaríamos andar contigo esti camín.

 

 

 

Asturies, xunu de 2019

Deja una respuesta

Tu dirección de correo electrónico no será publicada. Los campos obligatorios están marcados con *