Inicio > Asturies > Asturies de la Primer a la Segunda Transición del Reinu d’España
AsturiesPortada

Asturies de la Primer a la Segunda Transición del Reinu d’España

Reflexón d’Andecha Astur tres l’alderique d’investidura de xineru de 2020.

 

El papel d’Asturies nel pasu de la Primer a la Segunda Transición del Reinu d’España

 

  1. De la Primer a la Segunda Transición española

Los resultaos qu’ufrieron les caberes elleiciones cellebraes pa les Cortes españoles (payares 2019) acaben de determinar agora (xineru 2020) l’empiezu forciáu d’una nuea dómina política: la Segunda Transición del Reinu d’España.

Pa xustificar cómu acaba frañer la Primer Transición española, dando pasu a la Segunda, tenemos de situamos mentalmente nun planu matemáticu definíu polos clásicos dos exes. L’exe horizontal (exe x o d’ordenaes) define, dende’l puntu central 0 fasta l’estremu esquierdu, una predominancia ca vegá superior del progresismu políticu; mentantu que dende’l puntu 0 fasta l’estremu drechu define la predominancia del conservadurismu.

Pel so llau, l’exe vertical (exe x o d’abscises), indica, dende’l puntu central 0 fasta’l nivel superior, el xorrecimientu del sentimientu soberanista nes naciones sometíes pol Estáu español; y dende 0 fasta’l so nivel inferior indica un creciente empoderamientu del españolismu.

El tiempu anterior, la Primer Transición, entamó cuandu, a la muerte’l dictaor facista (1975), les fuercies españoliegues (de dreches y d’esquierdes) aprofitaron la so superioridá pa llantar a les clases populares y a les naciones sometíes pol Estáu unos primeros pautos políticos: Pautos de La Moncloa y Costitución española de 1978. L’arcu parllamentariu españoliegu taba convencíu de la so predominancia y, sintiendo segura la soberanía política del Estáu español, dedicaron les sos fuercies a escenificar conflictos de clas ente elles, cuandu lo que facíen yera diluyir y controlar esos conflictos, corcocircuitando siempres tou riesgu d’españíu social.

Dende entós fasta agora, los grandes partíos españoles teníen la seguranza de que podíen alternase melgueramente nel poder y de que, comu muncho, podíen necesitar el sofitu puntual de dalguna fuercia de la drecha non españoliega (PNV, CiU), por un preciu razonatible. Asina, en 1993 Felipe González negoció con CiU y PNV, igual que fexo Aznar en 1996; en 2008 Zapatero negoció col PNV, comu fizo Rajoy en 2017.

Treslladando estos datos al planu matemáticu enantes referíu, atopámosmos con que’l puntu de la rialidá política de ca momentu siempres s’asitiaba nel cuartu cuadrante del planu (predominancia conservaora y españoliega) o nel tercer cuadrante (predominancia “progresista” y españoliega).

Hai, sí, una pequeña variante: en 2004, Zapatero aportó a La Moncloa col sofitu d’ERC, IU, CC, BNG y CHA, pero naquella dómina’l conflictu de clas siguía siendo más importante. Esti cambiu momentáneu nos vezos de texer alliances de gobiernu nel Estáu español yá señaló entós el riesgu que tenía’l sistema d’entrar en barrena nuna segunda transición. Foi precisamente nel momentu en que l’Estáu español consideró necesario negociar una salía al conflictu nacional vascu (negociación con ETA) y coincidió nel tiempu col fortalecimientu progresivu de la vindicación soberanista catalana (9N o “Procesu participativu sol futuru políticu de Catalunya”).

Yá entós l’Estáu español, la corona y los partíos que los defenden debieron algamar conclusiones y adoptar midíes urxentes de correición del mapa políticu que garantizasen la so continuidá nel control del poder. Pero nun lo fexeron, básicamente porque los nutrientes descomanaos que-yos aportaba entós la corrrución peraceleraron los sos apetitos de nutrientes más ricos y abondosos, al empar qu’aformigaron los sos sintíos de la visión y l’olfatu políticos. Sólo la drecha española tuvo una mínima reación: la d’entrar nun procesu celular de xemación pa finar dividiéndose (PP, Ciudadanos, Vox), lo que-yos facilitó abarcar tol campu fasta la estrema drecha; pero mesmamente esta rempuesta nun foi suficientemente rápida nin eficaz.

Aportamos asina a les elleiciones españoles d’abril y payares de 2019, cuandu colapsa dafechu l’arquiteutura política texía na Primer Transición. ¿Por qué? Porque la única fórmula de gobiernu posible yá nun asegura la predominancia indiscutible del españolismu. El sistema español nun considera pelligrosos a Podemos (que pasa a seruna muleta del PSOE), IU (integrada en Podemos), PNV, Más País, Compromís, Nueva Canaria, BNG y Teruel Existe. Dalgunos d’ellos yá collaboraron nel Estáu o en dalgunes de les sos “comunidaes autónomes” con gobiernos del PSOE o del PP, ensin qu’ello representare dengún pelligru pa la estabilidá de la soberanía española.

Pero ye qu’agora nun abasta con esos votos. El PSOE de Pedro Sánchez tuvo de remangase y negociar tamién l’astención d’EH Bildu y ERC. De mou que la fórmula de gobernanza política del Reinu d’España depende agora de lo que decidan estes dos fuercies, ñidiamente soberanistes.

Ye dicir, el puntu que define la rialidá política d’anguañu nel planu matemáticu enantes comentáu asitíase nel segundu cuadrante (cuandu l’exe x avanza haza la esquierda y l’exe y xube haza les cotes altes del soberanismu propiu). El cuadrante onde más pelligren los intereses económicos de la burguesía y l’autoridá identitaria y política del Estáu español.

Pero’l sistema políticu español consideró d’interés xugar esta cabera baza: permitir que’l PSOE fore’l cabezaleru d’un nueu frente políticu col que, a cambiu de dalguna cesión mínima nel conflictu de clas, nun ceder ná importante nel conflictu de soberanía que l’Estáu español caltién coles naciones sometíes. Esto ye lo que representa’l nueu gobiernu de Pedro Sánchez. Podemos pon cara misericordia y caridá cuandu fala del conflictu identitariu que balte nel Estáu español, pero defínense comu españoles y enxamás van más allá d’esi discursu caritatible. Ente los demás aliaos circustanciales del PSOE tampocu nun hai naide que, yá seya pola so posición política o pola so presencia cuantitativa, puea poner en pelligru la predominancia de la soberanía española. L’únicu pelligru del Reinu d’España ye tar colgando agora del feble filu que representa l’astención d’EH Bildu y ERC, sabiendo que los pueblos vascu y catalán son arteros en cabruñar bien los cortes y que nun se sienten españoles en mou dalgún.

En tou casu, el PSOE ta preparáu pa, en cuantes seya mester, convocar nuees elleiciones enantes de tener que facer grandes concesiones nel imperiu xeneral de la españolidá.

 

  1. El papel d’Asturies na nuea dómina política

Ye importante conocer y pescanciar bien lo qu’asocede col reinu que mos domina. Pero tamién lo ye tener ñidiu’l papel que xugó, que xuega y que queremos que xuegue la vieya nación asturiana nesta nuea dómina.

El pasu de la Primer a la Segunda Trasición, por colapsu de la cadarma política española, representa un cambiu políticu y de reequillibrios territoriales importantísimu. El más destacáu nos caberos 45 años. ¿Y cómu ta escomencipiando esta Segunda Transición? Nun podemos acollumbrar mui acullá, pero ye ñidio que nestos anicios Euskalherria y Catalunya tán meyorando sensitiblemente la so capacidá pa condicionar la rialidá política del Estáu español y que los partíos españoles tán dexando a Asturies dafechamente al marxe del procesu, utilizándola comu un pión sometíu y útil pa los sos intereses.

El comentariu que sigue tien calter aneudóticu, pero ye una metáfora de claru valor desplicativu. Nel caberu debate d’investidura que llevó al poder al PSOE, la única representación d’una voz supuestamente asturiana foi la d’Isidro Martínez Oblanca, diputáu de Foro Asturias. Velu finar el so discursu glayando puxa la costitución, puxa’l rei y puxa españa, coriáu por una gran parte del facismu presente nel Congresu , foi ver cómu Foro Asturias circula yá pelos carriles de la estrema drecha y a una velocidá que los convierte en “novios de la muerte”, porque fai cuasi imposible correxir posiciones. Ye que, si miramos con aposientu la rialidá, fizo más por Asturies el diputáu de Teruel Existe, cuandu consiguió que’l PSOE aparare’l pieslle de taquilles de Renfe (salvando 150 estaciones del nuesu país) que cualisquier sarxentu chusqueru de Foro Asturias.

D’esto algamamos una conclusión cenciella: nun ye una situación soportable qu’Asturies nun tenga representación político propio nos muérganos de gobiernu asturianos nin nos españoles.

Los 3 diputaos del PSOE, 1 de Podemos y 2 del PP-Foro nel Congresu español  nun desempeñen ellí más qu’un papel de comparses de los sos partíos y de los intereses del réxime español de 1978, pero en dengún momentu representen los intereses riales, de clas y nacionales, d’Asturies. Escusamos analizar el papel del diputáu de Vox.

Ente esta rialidá, la única salía posible ye l’entamu d’un frente ampliu del soberanismu/asturianismu. Falamos d’un frente políticu nel que toes y toos podamos caltener les nueses diferiencies de camientu y la identidá de les nueses organizaciones, pero tamién d’un frente qu’axunte bien toles nueses fuercies na defensa de tres puntos básicos: la superación del Estatutu d’Autonomía impuestu, la reconocencia de la oficialidá del asturianu y l’acabu de les polítiques coles que’l Reinu d’España agrede Asturies en tolos ámbetos (mediuambiental, demográficu, identitariu, llaboral, enerxéticu, presupuestariu, industrial…).

Nun se pue consintir que porque la drecha española radicalice los sos discursos, les sos conductes y los sos oxetivos, el PSOE puea apaecer comu l’alternativa necesaria, y la única alternativa. Lo qu’asocedió n’Asturies nos caberos 40 años ye la meyor preba de que’l PSOE ye parte de la drecha política española. Vigil, Trevín, Areces, Fernández, Villa, Barbón, Lastra… Ellos son tamién parte de la drechona, del españolismu y de la corrución. Magar qu’Adriana Lastra tenga’l focicu de dicir en Madrid que “Asturies nun ta en decadencia”, nós perafitamos qu’ellos, el PSOE, son los responsables de la dura y llarga crisis de la nación asturiana. (Ellos son los xenocides políticos d’Asturies).

Si’l PSOE tien agora interés n’algamar una fórmula estable pa la gobernanza del Reinu d’España, a Asturies nun-y interesa un res dar estabilidá al PSOE nesa xera. Les asturianes y asturianos nun tenemos nin obligación nin interés en rescatar al PSOE del fracasu del modelu d’Estáu español que ñació cola Primer Transición, nin de nengún otru modelu d’Estáu español.

Poro, convitamos al Pueblu Asturianu a reflexonar sobro esta posibilidá d’aniciar un frente ampliu del soberanismu / asturianismu, una opción na que naide nun tenga de diluyise ente naide, onde toos aconceyemos pa xuntar enerxíes na defensa d’esos tres puntos mínimos irrenunciables pal futuru d’Asturies:

  1. Superación del Estatutu impuestu
  2. Oficialidá de la llingua asturiana
  3. Acabu d’agresiones del Reinu d’España pa con Asturies

 

 

Xineru, 2020.

3 thoughts on “Asturies de la Primer a la Segunda Transición del Reinu d’España

  1. Xuan de la Kanaļļa

    Bon ya gran artículo

  2. Xuan de la Kanaļļa

    Bon ya gran artículo

Responder a Xuan de la Kanaļļa Cancelar respuesta

Tu dirección de correo electrónico no será publicada. Los campos obligatorios están marcados con *