Inicio > Asturies > Andecha Astur pide que se controle la venta carne n’Alimerka y un sofitu decidíu a la IXP Xata Asturiana
AsturiesLlaboralPortada

Andecha Astur pide que se controle la venta carne n’Alimerka y un sofitu decidíu a la IXP Xata Asturiana

Tres la decisión d’Alimerka de francer unillateralmente contratos con ganaeros de la IXP Xata Asturiana, Andecha Astur reclama la intervención de la Conseyería de Sanidá pa torgar que dicha empresa vienda como Xata Asturiana lo que nun lo ye.

Conforme a lo apaecío n’estremaos medios de comunicación, fasta agora Alimerka comercializaba cuasi’l 50% la carne d’Indicación Xeográfica Protexía Xata Asturiana. Dende esi control hexemónicu del mercáu, en plena cris socioeconómica del coronavirus y traicionando la so estratexa publicitaria sofitá nel so amor a Asturies, Alimerka acaba francer los contratos n’esclusividá con 30 cebaeros d’esta IXP, dexando na cuneta a munches más families comprometíes nesta xera.

Per un llau denunciamos el dañu qu’Alimerka causa a Asturies, poles importantes consecuencies económiques y tamién polo que supón de custionamientu d’un modelu sociocultural y productivu tradicional nel país.

Col so determín, Alimerka pierde tola confianza que-y podía tener l’Asturies ganaera y campesina, sobro too les 6.004 families con ganadería d’IXP Xata Asturiana, qu’anguañu cunta con 86.977 vaques reproductores y que ca añu certifica muncha más carne d’esta marca nos circuitos comerciales asturianos ya internacionales. La Xata Asturiana yera l’iconu de la imax asturiana que quería dar Alimerka; al renunciar a ella, yá nun s’estrema un res de les demás caenes de supermercaos, que foncionen sólo polos sos porgüeyos económicos, ayenes a los intereses d’Asturies. Esti determín d’Alimerka confirma la doliosa imax que yá dio na fuelga reciente de los sos trabayaores, asina comu la necesidá de campañes comu la #ConsumiAsturiano que tenemos en marcha.

Nesti sen, Andecha Astur pide al Conseyeru de Desendolcu Rural, Agroganadería y Pesca, Alejandro Calvo, la so intervención nel conflictu pa garantizar el futuru de l’Asturies ganaera que se compromete a caltener la IXP Xata Asturiana y pa torgar que los abusos nel mercáu condicionen de manera tan inxusta un seutor productivu fundamental pal país asturianu.

Per otru llau, Andecha Astur, camienta que, dende agora, los supermercaos d’Alimerka conviértense en puntos de venta de carne de procedencia duldoso.

Alimerka tien un cebaeru de Xata Asturiana en Villaviciosa (La Lloraza, Oles), con capacidá pa 1.100 xatos, el 25% de la carne de Xata Asturiana que viende nos supermercaos. Al frañer los contratos colos ganaeros, Alimerka va tener nos mostraores de les sos carniceríes un 75% de xata procedente d’otros países, daqué más de 3.000 xatos.

Poro, Andecha Astur pide al Conseyu Regulaor de la IXP Xata Asturiana y al Conseyeru Sanidá, Pablo Ignacio Fernández (al traviés de l’Axencia de Seguranza Allimentario, Sanidá Ambiental y Consumu), que faigan un seguimientu peresmeráu de la carne que d’agora n’adelantre comercializa Alimerka con esta etiqueta.

Desiximos que’l Conseyu Regulaor de la IXP y la Conseyería de Sanidá aseguren qu’Alimerka fae nos sos supermercaos un usu llegal y correchu de los símbolos y cartelería de la IPX Xata Asturiana. Y que la carne de xata d’otros países apaez afayaízamente separtao y etiquetao, pa evitar que se tracamundie a los consumiores con práutiques engañoses o fraudulentes.

Deja un comentario

Tu dirección de correo electrónico no será publicada. Los campos obligatorios están marcados con *