Tres l’espoxigue de la drecha nestes elleiciones Diego Morís ‘Roxu’, candidatu d’Andecha Astur, afonda na necesidá d’un frente común asturianu
En viendo los resultaos d’estes elleiciones, quédamos claro que la sociedá asturiana lo que pidi ye un frente común asturianu qu’acomuñe los enfotos de quienes lluchamos por un meyor futuru p’Asturies, que nun caiga en manes de la drecha.
Ta nidio que les propuestes sucursalistes nun furrulen, nun son una alternativa, porque piensen y actúen en clave española y acaben faciendo d’Asturies un barriu de Madrid. Tampocu nun mos paez práutico seguir apostando por soluciones máxiques, nun creyemos que l’alternativa pase per ‘partíos millagru’ que llevanten illusiones y en cuantes se topen cola rialidá esapecen en cuatro díis, si ye que nun acaben tamién metíos nuna sucursal española… d’eso yá sabemos muncho n’Asturies.
Pa nós la salida ta n’avanzar na xunidá d’aición ente tola xente que se siente asturiano y d’izquierda. Apostamos por un espaciu común, plural, ampliu. Pa nós lo qu’Asturies necesita ye un Frente Común, asturianu y d’izquierdes. Esa ye la llinia na que tamos trabayando dende Andecha y na que vamos siguir con más enfotu que nunca.
Trabayar ye precisamente la clave nesti momentu, pa la xente asturiano quedar en casa ye un lluxu que nun mos podemos permitir. Hai que comprometese, hai qu’espoxigar, ye necesario que la xente s’organice. Nun voi decir que tea de ser necesariamente n’Andecha Astur, pero la xente que tien un compromisu col país tien qu’organizase, siempres col oxetivu de la xunidá, pero hai que movilizase.
Y esta movilización, esta organización nun espaciu común, ye prioritario agora mesmo viendo los resultaos elleutorales. L’avance de la estrema drecha n’Asturies tien que servimos d’obleru pa enfotamos más nel llabor. Ye nidio que la inversión fecha va cuatro años por Adrián Barbón, financiando económicamente y dándo-y visibilidá mediática a VOX al regala-yos grupu parllamentariu, ta dando los sos frutos, que nun son otros que’l xorrecimientu de la drecha más españolista n’Asturies.
Hai qu’organizase y trabayar.
