Andecha Astur expresa la so conderga pola escesiva y desproporcionada presencia policial durante les recientes manifestaciones pro-palestines, llevaes a cabu col motivu de la participación del equipu Israelín na Vuelta Ciclista y recuerda que güei tan convocaes más concentraciones
Mientres el presidente del Principáu, Adrián Barbón, trata de colgase la medaya fácil de defensor de los drechos humanos, llindándose a facer declaraciones ensin repercusión, el so gobiernu presiona, coharta y detién a les persones que acudieron a exercer el so drechu de manifestación.
Depués de la interrupción de la salida de la Vuelta en Cabezón de la Sal, Cantabria, produxéronse distintos incidentes na parte asturiana de la etapa, destacando:
- Identificaciones irregulares de manifestantes.
- Excesu inxustificáu de presencia policial en puntos estratéxicos.
- Menacies de detención a quienes participaben na protesta.
- Confiscación de pancartes na zona del Caudal.
- La policía impidió l’accesu a dellos tramos de la carretera, torgando ver la vuelta durante Km.
- 12 detenciones en L’Angliru, tras intentar detener la marcha ciclista pa expresar la protesta.
Dende Andecha Astur, consideramos que la actuación policial foi nidiamente desproporcionada y denunciamos la evidente contradicción ente la teórica defensa de la causa palestina por parte del Principáu y la represión activa de les protestes ciudadanes.
La organización reclama al gobiernu asturianu que respete los drechos fundamentales de reunión y manifestación y que cese la represión. Tamién solicita que Adrián Barbón demuestre’l so sofitu a la causa palestina instando al presidente del gobiernu español, Pedro Sánchez, a interrumpir cualquier tipu de colaboración, apoyu militar o financieru con el réxime israelín y que l’estáu español use la so influyencia diplomática, económica y política pa protexer a la población civil cumpliendo col derechu internacional.
Andecha Astur felicita al Pueblu Asturianu pola so presencia nes protestes y reafírmase nel so compromisu cola solidaridá internacional, la defensa de la causa palestina y los drechos humanos, y advierte que la presión y la intimidación policial nun conseguirán silenciar la voz de la ciudadanía. Anuncia tamién que continuará participando nes aiciones de protesta, entamando pola de güei a les 12:30 na cai Gutierrez Herrero d’Avilés, ensin dexase amedranar poles presiones policiales.
