Andecha Astur denuncia la nueva esclusión de la Filoloxía Asturiana nel borrador del Real Decretu Universitariu que ta preparando’l Ministeriu de Ciencia, Innovación y Universidaes. Nel documentu, inclúinse les filoloxíes Española, Catalana, Gallega y Vasca, pero nun apaez la Filoloxía Asturiana nin se reconoz la “Llingua y Lliteratura Asturiana” como especialidá académica.
Esta esclusión repite’l mesmu despreciu institucional que dende hai años venimos denunciando: l’asturianu sigue tratándose como una curiosidá folclórica y non como una llingua con drechu plenu a presencia na universidá y nos espacios oficiales. El borrador del decretu, amás, sustitúi les antigües “áries de conocimientu” por “especialidaes” y, nel nuevu marcu, l’asturianu quedaría dilíu dientru de categoríes xeneriques como Llingües Modernes y sos Lliteratures, lo que ñega’l so valor propiu y académicu.
Resulta inda más indignante qu’el gobiernu d’Adrián Barbón, que nun pierde ocasión pa falar del “compromisu col asturianu”, nun pase de les bones pallabres y los xestos simbólicos. En toos estos años de gobiernu, nun dio nin un pasu real pa garantizar la oficialidá, nin la presencia normalizada del asturianu na educación o na universidá. Agora, ante esta nueva agresión del Estáu, calla y mira pa otru llau.
Andecha Astur reclama:
- La Oficialidá dafechu de la llingua asturiana.
- Que’l Ministeriu modifique’l borrador del Real Decretu ya incorpore la Filoloxía Asturiana como especialidá con identidá propia.
- Que’l Gobiernu del ‘Principado’ desixa formalmente esa inclusión y defienda, por fin con efeutos reales, la dignidá de la nuesa llingua.
- Que la Universidá d’Uviéu y el so profesoráu s’amuesen firmes na defensa del campu d’estudiu del asturianu.
La defensa del asturianu nun pue siguir siendo un asuntu de discursos, sinón de fechos. La oficialidá ye urxente, la dignidá llingüística inegociable, y la presencia universitaria indispensable. Porque lo que fai falta ye garantizar drechos básicos, non concesiones.
