Nel actu anuncióse la esistencia de conversaciones con otres formaciones nacionaliegues d’izquierda del Estáu p’articular una rempuesta al xorrecimientu de la ultraderecha española
L’actu d’homenaxe a Andrés Solar Santurio, Andresín el de Deva, cellebróse como un exerciciu de memoria colleutiva y como un momentu de reafirmación política. Acullá de la ufrienda floral, l’actu convirtióse nun espaciu de reflexión y compromisu, nel que se fixo una valoración crítica del momentu actual que vive’l país y del papel que correspuende desempeñar a les organizaciones nacionaliegues d’izquierda.
La intervención política, a cargu de Llucía Fernández, recoyó’l llegáu políticu y vital d’Andresín, señalando que la meyor manera d’honrar la so figura nun ye namás el recuerdu, sinón la continuidá de la so xera. Siguir falando claro, siguir organizándose y siguir construyendo alternatives dende la izquierda nacionaliega fueron señalaos como principios irrenunciables. Andresín foi presentáu como un militante ensin ambigüedaes, un intelectual comprometíu y una persona que nunca refugó dar la cara por Asturies, pola llingua asturiana y polos derechos del pueblu asturianu, siendo la so vida un exemplu de coherencia ente pensamientu y aición.
Darréu, la intervención punxo’l focu nel contestu políticu actual, marcáu pol avance de la ultraderecha española, la normalización del so discursu reaccionariu y la perda progresiva de credibilidá del PSOE. Señalóse la incapacidá d’esta fuercia pa dar rempuesta a les necesidaes sociales y a les reivindicaciones nacionales, asina como la so corresponsabilidá nel escenariu actual. Trátase d’un procesu de calter estructural, non coyuntural, que tien consecuencies direutes sobre los pueblos ensin soberanía.
Nesti marcu, informóse de que la organización ta agora mesmo en contautu con otres organizaciones nacionaliegues d’izquierda del Estáu español, col oxetu d’estudiar y coordinar rempuestes comunes frente a la ofensiva reaccionaria. Nun se trata de plantegar sumes artificiales nin frentes elleutorales improvisaos, sinón d’afitar llinies de trabayu compartíes ente pueblos que carecen una mesma realidá: la d’un Estáu que niega derechos nacionales, precariza les condiciones de vida y facilita l’ascensu de la ultraderecha.
La referencia a la perda de credibilidá del PSOE foi presentada como una constatación ampliamente compartida por sectores sociales ca vegada más amplios, consecuencia de promeses incumplíes, renuncies constantes y una xestión política que, llueu de frenar el retrocesu en derechos y llibertaes, acaba contribuyendo a elli. Frente a esta situación, reivindicóse la necesidá de construyir alternatives polítiques nidies, dende la izquierda y dende los pueblos, ensin tuteles nin dependencies.
L’homenaxe a Andresín convirtióse asina nun puntu partida, non nun exerciciu de nostalxa, sinón nun llamamientu a l’aición política. Como recuerden los sos versos más conocíos, «Prúyemos un Pueblu Llibre», una idega que sigue teniendo plena vixencia. Nun ye tiempu de galvana nin de silencios, sinón d’organización, coherencia y compromisu col futuru del pueblu asturianu.
Porque, como se dixo nesi actu, nin el cansanciu, nin la invisibilización, nin el ruiu de la ultraderecha van poder con un pueblu que decide siguir avanzando.
