María Calvo Carbajal, Presidenta de FADE , remana datos falsos.
La cifra real de puestos de trabayu vacantes n’Asturies ye de menos de la cuarta parte de lo qu’afirma la presidenta
Les recientes declaraciones de la presidenta de FADE son un insultu a los y les paraes que busquen trabayu, a los perceutores de salarios sociales y a les decenes de miles d’emigraos con alta formación que tuvieron d’abandonar el país por falta trabayu. Un insultu, en xeneral, al pueblu asturianu nun intre ya de por si difícil.
Nes sos declaraciones cifró en 6.000 el númberu de puestos de trabayu vacantes esistentes n’Asturies, negando que seyan les ínfimes condiciones llaborales les que torguen que se cubran ya echando la culpa d’esta falta de trabayaores a les ayudes sociales y la escasa formación de los asturianos. Neses afirmaciones hai tres falacies.
Si consultamos los datos del’Istitutu Nacional d’Estadística alcontramos que, acordies la Encuesta Trimestral de Costu llaboral, son 1.514 el númberu de vacantes esistentes n’Asturies nel segundu trimestre de 2.022, una cifra garrada en plenu branu cola demanda hostelera al másimu. Ello ye, la cifra real ye de menos d’una cuarta parte de lo que diz esta señora.
No que cinca a formación, les estadístiques amuesen que los homes y muyeres d’Asturies cunten con un nivel d’estudios bien perriba de la media española, dao qu’alrodiu’l 50% de la población adulta asturiana cuenta con formación superior, siendo asina especialmente pente les muyeres, que presenten un nivel de formación y tamién un nivel de desemplegu mui perriba de los de los homes.
Pa finar, l’acusación fecha pola presidenta de FADE de que los salarios sociales torguen la busca d’emplegu ye, a cencielles, rastrera y cae por si sola cuando aparamos a mirar los importes de los mesmos. Denguna familia, voluntariamente, refuga un ingresu mayor cuando vive con escasamente de 250 € por persona.
Non, nun hai 6.000 vacantes n’Asturies.
Non, nun falta formación.
Non, nun mos conformamos coles “paguines”.
Queremos trabayos dignos con salarios dignos y condiciones dignes.
Y que nun mos mientan a la cara
