Inicio > Asturies > Andecha Astur propón un conveniu asturllionés pa caltener y revalorizar les fortificaciones militares de los años 1936-1937
AsturiesPortada

Andecha Astur propón un conveniu asturllionés pa caltener y revalorizar les fortificaciones militares de los años 1936-1937

Con esta propuesta y el tradicional homenax nel Puertu Tarna, Andecha Astur cellebra’l 85 aniversariu la proclamación del Conseyu Soberanu d’Asturies y Lleón

Andecha Astur acaba proponer al Gobiernu d’Asturies la robla, col Gobiernu de Castiella y Lleón d’un conveniu coperación, pa l’aprebación de los respeutivos Planes de Caltenimientu y Revalorización Hestórica de les fortificaciones militares de los montes d’Asturies y Lleón, cooperando pa regular la so conservación, señalización, integración en rutes, inclusión n’actividaes de promoción del turismu con enfotos culturales y hestóricos, la necesaria formación de guíes turísticos y la fechura de campañes
istitucionales de divulgación.

Esos preseos llegales deberíen garantizar el futuru les fortificaciones asitiaes n’Asturies, asina comu les qu’anguañu s’alluguen en tierres lleoneses, ente otres aquelles que tán n’Alboleya, Castiltejón, Fontañán, La Granda, La Pola Gordón, Peña Lázara, Peña Morquera, Vegarada, Villablino, Tarna…

Creyemos qu’esta propuesta ye una aportación valiosa pa la Memoria Hestórica Asturiana. Con ella y col tradicional homenax nel Puertu Tarna, que facemos esti domingu, 21 d’agostu, Andecha Astur cellebra’l 85 aniversariu de la proclamación del Conseyu Soberanu d’Asturies y Lleón, que presidió Belarmino Tomás.

Abúltamos un Conveniu pernecesariu, porque na dómina’l conflictu armáu conocíu comu “Guerra civil”, el Conseyu Soberanu d’Asturies y Lleón diseñó la política de defensa de los territorios sobro los qu’exercía’l so poder soberanu, esto ye, l’Asturies d’anguañu xunta dellos conceyos qu’agora formen parte de Lleón.

La política militar del Conseyu Soberanu carauterizóse pol decidíu control de tolos puertos de montaña polos que s’acedía a Asturies. Asina destinó abondos batallones a la defensa d’esta llínia de los ataques del exércitu facista español. Pa con ello costruyó un bayurosu complexu de fortificaciones defensives, llevantaes en plenu monte, cuasi ensin medios, con piedra y formigón. Asina los montes d’Asturies y Lleón
tán apinaos de casamates, trincheres, parapetos, búnkers de galería… Esti llabor de fortificación representó un retu descomanáu pa un pequeñu país, y algamó tala importancia militar y hestórica que llueu esta llínia conocióse comu la “Maguinot asturiana” (en referencia a la llínia de defensa militar que costruyó Francia énte les tropes nazis).

Munches asturianes y asturianos dieron la vida nuna amuesa de resistencia heróica dende estos montes, defendiendo la llibertá’l so pueblu. Ellí resistieron, con una correllación de fuercies ñidiamente desproporcioná a la so escontra, al exércitu facista español, aidáu entós pola Lexón Cóndor, l’aviación nazi.

Nun hai dulda de qu’esti conxuntu fortificaciones costitúi un padremuñu arqueolóxicu, hestóricu y cultural d’un valor cimeru p’Asturies.
Sicasí, la rialidá amuesa que munches d’elles afáyense anguañu nun estáu de caltenimientu llamentable, condergaes pol abandonu y la destruición, asina comu pol escaezu de la memoria popular. El so valor padremuñal desixe dalguna iniciativa pública que dé acabu a esa llaceriosa situación, motivu pol qu’Andecha Astur propón esti Conveniu Coperación ente Asturies y Lleón.

Deja un comentario

Tu dirección de correo electrónico no será publicada. Los campos obligatorios están marcados con *