Inicio > Asturies > Andecha Astur solidarízase cola CNT nel casu La Suiza
AsturiesLlaboralPortada

Andecha Astur solidarízase cola CNT nel casu La Suiza

La sentencia ye un artificiu del Estáu español pa la persecución sindical

Pidimos la dimisión de la Dellegá’l Gobiernu n’Asturies, Delia Losa

 

El sindicalismu asturianu de llucha, nesta ocasión coles respetables siegles de la CNT, apuntó certeramente escontra un empresariu acusáu d’esplotación llaboral y d’acosu sesual (Pastelería La Suiza, Xixón). Foi entós cuandu a la Dellegación del Gobiernu español-y paeció que se cruciare la raya que separta’l sindicalismu apesebráu y consentíu d’aquel que da la cara y se compromete na defensa l’obreru escontra’l capital. Y, per aciu la fiscalía y del maxistráu-xuez Lino Rubio Mayo, antiobrerista pernomáu, acaben de fabricar una sentencia exemplarizante: 7 miembros de la CNT condergaos a 3’5 años de cárcele y a pagar 150.000 € en conceutu d’indenización al empresariu.

Andecha Astur amuésase solidaria colos 7 compañeros represaliaos de la CNT y cola so organización sindical. Desiximos qu’istancies xudiciales superiores igüen esti casu de persecución de trabayaores comprometíos con una aición sindical a la que tienen llexítimu drechu. Denunciamos esta sentencia comu un artificiu llegal destináu a represaliar l’acción sindical y la defensa de los drechos de los trabayaores. Responsabilizamos d’esti ataque direutu a la clas trabayaora al xuez sentenciaor, por supuesto, pero tamién a la Dellegación del Gobiernu español, cuyos deseyos de sentencia vengatible supo interpretar tan bien el señor Rubio Mayo.

La Delegación del Gobiernu español emplegó, más que nunca nesti casu, los sirvicios fieles de la policía y la fiscalía pa fabricar ex profeso un escenariu criminosu que permitiere represaliar una actividá sindical que la CNT desendolcó en tou momentu de forma digna, responsable y democrática.

Considerando que la sentencia ye ún de los mayores ataques sofríos pol movimientu obreru asturianu nos caberos años, Andecha Astur desixe la dimisión de Delia Losa Carballido comu Dellegá del Gobiernu español n’Asturies. Nun ye sostenible qu’a esta presona se-y permita completar impunemente’l so curriculum de “aparatiche” del PSOE cola represión del sindicalismu asturianu, cuandu yá resultaben impresentables los sos precedentes: fía d’un alcalde-capo de les cuenques mineres, muyer d’un militar español, abogá del gabinete xurídicu del grupu parllamentariu del PSOE nel Congresu español, Secretaria de Rellaciones Istitucionales nel gobiernu de Pedro de Silva, Xefa de la Xunidá Xurídica de Farmacia y d’Ispeición de Centros y Sirvicios Sanitarios del gobiernu PSOE n’Asturies, Secretaria de Política Istitucional de l’AMSO, integrante del comité federal del PSOE, vocal de la Comisión d’Ética y Garantíes del PSOE y, sobro too, cabezalera de la plataforma de sofitu a Pedro Sánchez na llucha pola Secretaría Xeneral del PSOE, siendo ésti motivu caberu’l principal de que-y tocare comu premiu’l cargu de Dellegá del Gobiernu español n’Asturies.

Deja un comentario

Tu dirección de correo electrónico no será publicada. Los campos obligatorios están marcados con *