L’informe del Tribunal de Cuentes súmase a la sentencia’ Tribunal Supremu nel Casu Riopedre y l’informe la Sindicatura Cuentes, afirmando la esistencia d’una corrución sistémica nel “Principado”
El Tribunal de Cuentes, tres fiscalizar les cuentes y xestión de los fondos mineros, señala la falta control nel repartu de les aídes a la minería’l carbón ente los años 2006 y 2017, denunciando que 1.786 millones d’euros d’esos fondos tuvieron un destín opacu ya irregular. D’esta cantidá, 1.105 millones destináronse a infracadarmes y 681 millones a proyeutos empresariales. El Tribunal de Cuentes afita que munchos recursos presupuestarios desapaecieron ensin llegar a executase les midíes a les que diben empobinaos. O que l’Istitutu de Reestructuración de la Minería del Carbón y Desenrollu Alternativu de les Comarques Mineres, encargáu de xestionar los fondos mineros, nun tenía los recursos téunicos y homanos necesarios pa cumplir la so fonción. Falta d’execución del 47% de les aídes ente 1998-2005, nengún plan mineru firmáu ente 2013-2018, descontrol, discrecionalidá, irregularidaes, incumplimientu requisitos, falta siguimientu, incumplimientu condiciones… son dalgunos de los términos que recueye l’informe del Tribunal de Cuentes.
Interpretamos esti informe comu una acusación clara d’inhibición dolosa, ocultación o complicidá, según los casos, de munchos de los miembros de la Comisión de Investigación sobro fondos mineros que foncionó en 2015 na Xunta Xeneral d’Asturies. Aquella comisión aconceyóse durante cuatru meses, atendió 67 comparecencies y, a lo cabero, refugó la propuesta de dictame qu’ellaborare’l so presidente, disolviéndose ensin conclusión dala.
A estos fechos amestamos l’informe que presentó apocayá la Sindicatura de Cuentes d’Asturies, de fiscalización sol estáu de la Cuenta Xeneral d’Asturies de 2018. Andecha Astur llevó esti informe ente la Fiscalía Xeneral porque preba que’l Gobiernu d’Adrián Barbón, les Conseyeríes del PSOE, los Muérganos y Entidaes d’elles dependientes cometen toa triba d’irregularidaes y fasta posibles delitos na so xestión: boicotéu del llabor de la Sindicatura, falta de contabilidá correcho, doble contabilidá con ingresos procedentes de fondos mineros, espedientes de créitu ensin valir llegal, ocultación de contratos menores, incumplimientu nel siguimientu los contratos, etc.
Antecedentes d’esta alministración pública corruta atopámosla na sentencia del Tribunal Supremu nel casu Riopedre-PSOE (setiembre 2019), que consideró acreitao que nel tiempu en que Álvarez Areces presidió’l gobiernu asturianu “quedó sostancialmente corrompíu’l procedimientu d’axudicación de contratos de suministru y d’obres en varies Conseyeríes” d’esti gobiernu, a saber la Conseyería d’Educación, la Conseyería d’Asuntos Sociales, la Conseyería de Cultura y la Conseyería d’Alministraciones Públiques. El Tribunal Supremu afitó na so sentencia que colos fechos condergaos non sólo resultó ñidiamente perxudicáu’l padremuñu públicu asturianu, “sinón que se llantó de facto un sistema d’axudicación de los contratos conveníos cola Alministración qu’afeutaba a tol sistema de la Comunidá Autónoma y non sólo al padremuñu d’ésta”, pola comisión de delitos de cohechu, malversación, prevaricación y falsedá, polo que, en términos políticos, puen definise aquellos años de mala gobernanza comu de corrución sistémica.
La sentencia’l Tribunal Supremu nel casu Riopedre, l’informe de la Sindicatura Cuentes y el caberu informe del Tribunal de Cuentes amuesen con claridá que nos principales partíos y sindicatos españoles esisten cadarmes organizaes con intereses delictivos comunes, que trabayen a comuña pa intervenir y controlar el furrulamientu de les istituciones de representación y gobiernu d’Asturies, precurando, con práutiques mafioses, la meyor satisfación de los sos intereses económicos particulares a costa de los presupuestos y fondos públicos.
Nun tamos ente una situación nuea, nin desconocía. Pero sí ye la primer vegá que les propies istituciones xudiciales y de fiscalización españoles vense obligaes, pa evitar responsabilidaes propies, a señalar la situación de corrución sistémica del réxime politicu que representa’l “Principado”.
Ente esta gravísima situación, Andecha Astur da por amortizáu’l tiempu de Barbón nel Gobiernu del “Principado”; yá sólo les sos responsabilidaes polítiques na situación que denunciamos faen que nun tenga sintíu dalu prorrogar la so presencia al frente’l gobiernu.
Asturies necesita un nueu tiempu políticu nel que seya una prioridá la fiscalización democrática de la xestión político fecho fasta agora y la depuración de les responsabilidaes polítiques y xudiciales que procedan.
Poro, Andecha Astur reforciará los sos contautos con toa triba d’organizaciones asturianes pa fortalecer la propuesta que ta treslladando estos díes, encadarmar una rempuesta xunitaria y una nuea dinámica de defensa d’Asturies comu país con futuru pa toes y toos, priorizando una nuea política que sofite los sos esfuercios llesxisllativos en cuatru aspeutos:
- En materia de seutores productivos, emplegu, redistribución de la riqueza y cris demográfico.
- Na promoción d’auditoríes de finances y deldes públiques, na llucha escontra la corrución y el control de la xestión público y la tresparencia.
- No que cinca a la oficialidá de la llingua asturiana y a les polítiques d’escolarización y normalización social de la mesma.
- Na superación del marcu políticu que carecemos anguañu: una institución, el “Principado”, y un Estatutu d’Autonomía impuestu.
Sólo asina Asturies podrá aspirar a vivir bramente nun réxime democráticu que puea ufrir un futuru dignu pa toles asturianes y asturianos.
