Inicio > Asturies > La Xunta Xeneral tramita’l pidíu d’Andecha Astur pa cellebrar istitucionalmente la Declaración de Soberania del 25 Mayu
AsturiesPortada

La Xunta Xeneral tramita’l pidíu d’Andecha Astur pa cellebrar istitucionalmente la Declaración de Soberania del 25 Mayu

PSOE, IU, Podemos y Foro tienen la oportunidá d’aidar a recostruyir la Memoria Hestórica d’Asturies y prebar con fechos la so cacarexá asturianidá

El presidente de la Xunta Xeneral d’Asturies acaba treslladar a los grupos parllamentarios la propuesta d’Andecha Astur pa que la Xunta aprebe una serie d’iniciatives y cellebre ca añu, de manera dina ya istitucional, que’l 25 mayu de 1808 la Xunta Xeneral exerció una temprana reconocencia política de la soberanía popular de les asturianes y asturianos, declarándose soberana, formando l’Exércitu Defensivu Asturianu, dotándose d’embaxaores d’Asturies qu’unvió al Reinu Xuníu, aniciando tribunales propios, istitucionalizando la bandera d’Asturies y collaborando col Pueblu Asturianu na defensa’l país astur y na escoyeta’l so futuru.

La insistencia de la esquierda nacionaliega asturiana en defender el 25 mayu comu fecha señalá de la nuesa hestoria comu Pueblu, sirvió pa caltener esi díi na memoria popular y forció al Gobiernu de Barbón a facer esti añu una primer cellebración oficial de la fecha, eso sí, falando sólo de bandera y tapeciendo la condición de determín soberanu d’aquellos fechos.

En tou casu, agora los grupos parllamentarios de la Xunta Xeneral tienen la oportunidá d’esclariar cuálu ye de verdá’l so compromisu en materia de recostrución de la Memoria Hestórica d’Asturies. Si torguen el trámite de la propuesta d’Andecha Astur confirmaríase que los partíos españoles roceen de la identidá del Pueblu asturianu y que mos ñeguen l’usu la nuesa memoria colleutiva comu preséu pa topar un futuru dignu pa toes y toos. Confirmaríase que tienen otros intereses, partidistes, mezquinos y ayenos a nós, enantes que trabayar pol futuru d’Asturies.

Ye imposible que, si nun apuesten por dañar los intereses d’Asturies, un grupu parllamentariu se puea ñegar a que la Xunta Xeneral declare’l 25 mayu de ca añu comu fecha de cellebración istitucional; a que ca 25 mayu la Xunta Xeneral convoque una sesión estraordinaria del Plenu, na que se llea un testu de remembranza d’aquella declaración soberana d’Asturies; a que ca 25 mayu’l Plenu la Xunta Xeneral visite istitucionalmente la Sala Capitular d’Uviéu, onde asocedió la hestórica declaración de soberanía; o a que ca 25 mayu la Sala Capitular de la Catedral d’Uviéu permaneza abierta al públicu pa la so conocencia y reconocimientu.

Cola propuesta d’Andecha Astur qu’agora-yos tresllada la presidencia la Xunta Xeneral, PSOE, IU, Podemos y Foro tienen la oportunidá de prebar con fechos la so cacarexá asturianidá.

Deja un comentario

Tu dirección de correo electrónico no será publicada. Los campos obligatorios están marcados con *