Cientos, miles d’Andresos faciendo país

L’homenaxe a Andrés Solar dedicáu a toles asturianes y asturianos que fain país díi ente díi

La intervención política de Llucía Fernández dellantre la placa qu’honra la figura d’Andrés Solar, tornó a reivindicar la calidá humana y el fondu compromisu social y nacional del ‘poeta d’Asturies’, recordando les munches presiones que careció pa que renunciara o tapeciera la so militancia política nel Ensame Nacionalista Astur, y se llimitara a la so faceta d’escritor.

“Apostaría que, de seguir vivu, munchos de los que dicen festexalu diben tar bien a la so escontra, porque Andrés yera molestu. Molestu pa l’autoridá impuesta, estorbu pal hipócrita, molestu pal que fuere a medies tintes, incómodu pal aprovecháu, pal falsu, pal cobarde, pal español”.

Pero sobro too, traxo a Andrés Solar al presente, topándolu nos miles d’asturianes y asturianos que faen país:

“Asturies ta estrada d’asturianos y asturianes que faen país, caún a la so manera, faciendo pintaes, xugando al baltu y a los bolos, escribiendo poesía, lluchando polos drechos llaborales, criando pita pinta, manifestándose pola oficialidá, votando a Andecha Astur, remocicando un horru, reclamando una vida digna pal pueblu, ensiñando, falando  asturianu, negándose a emigrar, canciando al país, faciendo teatru, faciendo política o, y equí voi llevar la contraria al poeta: con gaita, sidre y tambor, que tamién son formes de facer país y de lluchar escontra’l so desaniciu”.

Y acabó la so intervención colos cuatro versos nos qu’Andrés Solar recueye “tolo que ye la propuesta política d’un nacionalismu d’izquierdes”:

 Prúyemos un pueblu llibre,
que nome cola so voz los sos collacios y el pan,
prúyemos un pueblu llibre
y una Asturies Dixebrá.

Como davezu, tratóse d’un actu peremotivu, nel que los nacionaliegos y nacionaliegues perafitamos el compromisu y l’enfotu militante y honramos un añu más a una de les  principales figures de la nuesa hestoria recién.

L’actu finó con una ofrenda florar y la interpretación de ‘La Flor del Agua’