Intervención de Llucía Fernández nel homenaxe a Andrés Solar

Llucía Fernández protagonizó la intervención política qu’añalmente rializa Andecha Astur n’homenaxe a Andrés Solar

Aconceyamos güei equí, al pie del cimenteriu, non pa cellebrar la muerte, sinón la vida d’Andrés. Facémoslo equí, en Deva, y non n’otru llau, porque d’equí yera elli y queremos caltener fiel la so memoria y braera la so alcordanza.

Yo nun conocí a Andrés Solar, o si lo fice, yera mui nueva p’alcordame, pero les sos pallabres acompangáronme dende bien nena y tovía güei pienso nelli cuando veo una gavilueta tascar les plumes. Pueo dicir que, si non semaron, los sos poemes punxeron voz a lo que siento por esti país “Pruyemos un pueblu llibre, y una Asturies dixebrá”

Tamos equí tamién pa quitar voz a los que quieren facer d’elli un ciscu de sí mesmu, retayando la so memoria y dexándola n’asonsañu de quien yera. Porque sí, Andrés yera poeta, pero yera tamién muncho más qu’un escritor, yera un asturianu convencíu.

Tamos falando d’una persona que sintetizó en cuatro versos tolo que ye la propuesta política d’un nacionalismu d’izquierdes:

Prúyemos un pueblu llibre, que nome cola so voz los sos collacios y el pan, prúyemos un pueblu llibre y una Asturies Dixebrá”.

Apostaría que, de seguir vivu, munchos de los que dicen festexalu diben tar bien a la so escontra, porque Andrés yera molestu. Molestu pa l’autoridá impuesta, estorbu pal hipócrita, molestu pal que fuere a medies tintes, incómodu pal aprovecháu, pal falsu, pal cobarde, pal español.

Ya en vida, Andrés Solar topare col pilancu de quienes quinxeron echar abaxo la so militancia política, malagusto pola so coherencia y la claridá de la so visión nacionaliega, que resumía con cenciellez visionaria no que siempres intentó desplicar a tolos que tenía alredior.

Que la única forma llóxica de vivir n’Asturies ye siendo asturianu, ye lo único intelixente, ¿porque, si nun apostamos nosotros polo de nós, quién lo va facer?

Dacuandu entrúgome ¿qué sedría d’Asturies si la güestia nun mos arrampuñare tan mozu a Andrés Solar? Necesitamos xente comu elli.

En namás 29 años foi Poeta del país, miembru fundaor y candidatu del Ensame Nacionalista Astur, profesor de llingua asturiana, espublizó articulos en prensa, ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi tesoreru de l’Asociación d’escritores Asturianos y miembru de Conceyu Bable y de Xunta pola Defensa de la Llingua Asturiana… pero sobre tou nel so díe ente díe, de fechos y de pallabra Andrés fizo país por tolos medios que pudo.

¿Nun hai naide comu elli nel panorama actual asturianu? Non, comu elli non, igual non.

Pero sí. Asturies ta estrada d’asturianos que faen país, caún a la so manera, faciendo pintaes, xugando al baltu y a los bolos, escribiendo poesía, lluchando polos drechos llaborales, criando pita pinta, manifestándose pola oficialidá, votando a Andecha Astur, remocicando un horru, reclamando una vida digna pal pueblu, ensiñando, falando  asturianu, negándose a emigrar, canciando al país, faciendo teatru, faciendo política o, y equí voi llevar la contraria al poeta: con gaita sidre y tambor, que tamién son formes de facer país y de lluchar escontra’l so desaniciu.

Hai cientos de miles d’asturianos que, si nun lo faen too, ponen caún la so migaya pa caltener esti país en pie y si somos quien a acomuñalos, a facer que faigan ún nuna sola Andecha tendremos cientos, miles d’Andresos sacando alantre Asturies. Apostando polo de nós, siendo asturianos, porque si nun lo facemos nosotros… ¿Quién lo va facer?