Andecha Astur comparte campaña xunitaria na plataforma Asturies Insumisa
Porque cuandu Andecha Astur fala de xunidá d’aición y de formar frentes amplios d’izquierda asturiana faelo con tol enfotu’l mundiu, y trabaya díi ente díi por algamalo, esti branu compartiremos dientru d’Asturies Insumisa la campaña en defensa d’un turismu caltenible, non invasivu, respetuosu col mediu ambiente, colos drechos de los trabayaores del seutor y cola identidá asturiana.
Esti añu trabayaremos a fondo na campaña d’Asturies Insumisa, cola que munches organizaciones xuntaremos fuercies defendiendo un nueu modelu de turismu pal país. Al tiempu, les compañeres y compañeros d’Andecha Astur siguiremos espardiendo les nueses alternatives a la política turística oficial.
N’Asturies Insumisa defendemos un turismu:
- Que garantice los derechos llaborales de los y les trabayadores del seutor, con un emplegu de calidá y torgando l’emplegu precariu.
- Qu’evite la masificación y protexa’l mediu ambiente, respetando la nuesa tierra, les formes tradicionales de vida y la nuesa cultura y potencie’l conocimientu la nuesa llingua.
- Que regule una ecotasa, aplicada al visitante nes estancies turístiques, p’atender el sobrecoste que xenera’l turismu nos servicios públicos, como l’agua, la basoria, la llimpieza o’l mediu ambiente, y que redistribuya estos fondos ente los conceyos, según el pesu turísticu de caún d’ellos.
- Qu’impida la especulación colos pisos turísticos, qu’intervenga’l preciu d’arriendu la vivienda y persiga los alquileres illegales y el fraude fiscal nel seutor.
- Que potencie la economía llocal y xenere un repartu social xustu de la riqueza proveniente d’esti seutor.
