Inicio > Xunión Europea > Fadremos d’eses diez mil firmes diez mil voces, diez mil puños n’altu y diez mil presones dimpuestes a lluchar pola republica asturiana
Xunión Europea

Fadremos d’eses diez mil firmes diez mil voces, diez mil puños n’altu y diez mil presones dimpuestes a lluchar pola republica asturiana

Intervención de Llucía Fernández, candidata d’Andecha Astur al Congresu español, nel actu de presentación d’Agora Repúbliques.

Pa entamar quiero decir que pa los que somos Andecha Astur ye permotivante ya illusionante participar nesti procesu y formar parte d’Agora Repúbliques xunto con otres fuercies soberanistes.

Tamos orgullosos de participar nesta suma d’enfotos de tolos pueblos del Estáu que nagüen por un modelu socialista y democráticu, que defenden el drechu al autodetermín, que lluchen pola xusticia social, pol acabu la corrución y por un futuru dignu pa caún na so propia patria.

Un proyeutu que mos permite ufiertar una alternativa política con posibilidaes riales de condicionar de forma efeutiva la política a nivel d’Estáu y avanzar con ello nel procesu d’esaniciu de la monarquía española y l’aniciu d’un procesu costituyente de Repúbliques que tengan los sos pegollos llantaos nos drechos y llibertaes presonales y colleutives.

Dientru y fuera d’Asturies, Ye tiempu de sumar fuercies.

A nivel estatal, el réxime vixente del “Reino de España” lleva 40 años (tantos comu Franco) carauterizándose pol trespasu amable de poderes ente la drecha lliberal, que llidera’l PP, sofitáu agora por Ciudadanos y VOX y la drecha socialdemócrata, representá pol PSOE col encontu esporádicu d’IU y agora de Podemos.

Y la so intención ye continuar con esti sistema turnista que mos ta llevando, de la man de les ca vegada más voraces desixencies del mercáu, a una situación incaltenible na que les consecuencies sociales, económiques y mediuambientales que causen los nueos rumbos del capitalismu xabaz son, insufribles pa les clases populares y obreres.

La presencia ca vegá más desnuda de lo que representa un réxime de politicos enquistaos nos cebaeros y na corrución.

La imposibilidá d’una participación popular rial nel determín del nuesu futuru.

La ñegación d’horizontes de futuru pa que la población, especialmente la mocedá, siga vinculao a los sos territorios tradicionales.

El recorte progresivu de llibertaes democrátiques y de drechos llaborales y sociales.

La ñegación ca vegá más agresivo de les estremaes identidaes nacionales y l’amenorgamientu forciáu de les sos cultures y llingües (casu cimeru ye la ñegación de la oficialidá pa la llingua d’Asturies).

La pervivencia d’un modelu social pratriarcal, machista y violentu.

L’evidente podrigañu de les enteteles del estáu Y tantes otres razones… que faen que’l Estáu español se mos presente comu un ente esfarrapáu y al debalu que, por turnos, PSOE y PP faen por alitar y endrechar.

Nesti intre políticu crucial o bien dexamos atrás el réximen del 78, con tolo que conlleva o bien permitimos que s’afite dafechu, con tola so brutalidá. Los partíos estatalistes siguen col so mensaxe turnista: Podemos escoyer pente la drecha más retrógrado y llanzamos de tiesta a una involución social y democrática drástica o dexar les coses comu tan y dexamos dir morriendo d’a pocu.

Pero de fechu hai una tercera opción, y ye ser nos mesmos, la opción d’Andecha Astur y los sos coalligaos, finar colos cimientos que Franco dexó echaos y abrir les puertes a les llibertaes.

 

Falaba d’España y voi falar agora d’Asturies. N’Asturies tamos nun intre políticamente crucial y nuna situación social que namás puede calificase d’emerxencia que supera ampliamente tolo carecío n’otres fasteres del estáu: despoblación apocalíptica, cotes de precariedá llaboral inimaxinables va unos años, emigración forciada, represión de llibertaes, esaniciu cultural, paisaxísticu, identitariu… Una situación que n’Andecha Astur nun consideramos casual y que llevamos tiempu denunciando comu un xenocidiu anunciau.

Poro, esti nun ye’l intre de quedar quietos, nun podemos quedamos a mirar tolo que ta pasando, porque nun somos espectadores, somos parte de too ello. Tamos falando d’Asturies, de la so xente, de la so tierra, tamos falando de nós, de los asturianos y asturianes.

Nun ye tiempu, insisto, de llorar, nin de mirar pa otru llau, nun ye tiempu de mendigar ayudes nin de sentase a esperar a ver que mos manden dende Madrid. Dientru y fuera d’Asturies, Ye tiempu de sumar fuercies, y ye por ello qu’Andecha Astur preséntase énte’l pueblu asturianu comu una ferramienta d’organización que permita xunir fuercies p’avanzar hacia una República Asturiana na que’l pueblu seya, otra vegada, soberanu.

 

Agora que quedó n’evidencia que nun basta con qu’un partíu recueya unos teóricos principios sociales y económicos “d’izquierdes”, sinon que nun se pue defender Asturies siendo una sucursal madrilana y que pa costituyir una alternativa viable pa esti país ye imprescindible que lluche específicamente por y dende Asturies, Andecha Astur ufre un frente ampliu alrodiu d’un proyeutu de país y de sociedá a costruyir, un proyeutu viable de futuru al traviés d’un procesu de tresformación social, con Asturies como marcu específicu y ufriendo una alternativa digna de futuru pal Pueblu Asturianu. En resume, Una candidatura de llucha poles llibertaes, y polos drechos sociales. La única opción, de fechu, que tien a Asturies comu marcu de referencia y que defenderá los drechos del Pueblu Asturianu.

L’Asturies soberana, la que decide por si mesma, la que se llevantó fasta catorce vegaes escontra’l xugu estranxeru, la república d’obreros y campesinos d’Asturies que tuvo viva nel Conseyu Soberanu d’Asturies y Lleón nel 37, esa ye l’Asturies que representa güei Andecha Astur.

A los que creen na República comu mediu de gobiernu dígo-yos: El camín pa finar col Reinu d’España pasa por declarar la República Asturiana. Dende los pueblos del Estáu tendrán que ñacer les repúbliques que presllen la transición, finando col Reinu d’España y presllando un ciclu hestóricu. ¡Dende Asturies ñacerá la República, y sedrá soberana!

Nun podemos escaecer que güei tamos equí pa presentar la presencia d’Asturies, a traviés d’Andecha, nun movimientu de calter estatal y qu’Asturies ye un país con cientos de miles d’esiliaos. Nesi sen nun podemos dexar de recordar a los asturianos que nun podrán votar n’Asturies nes prósimes elleiciones, los asturianos que votarán en Catalunya,  en Canaries, n’Euskadi, n’Aragón o en Galicia, tienen una opción pa votar República, animámoslos a que voten a los partidos que formen parte d’esti proyeutu pa sumar a los distintos pueblos del estáu que carecemos la mesma opresión.

 

Pa poder participar nestes elleiciones, tres la postrer reforma de la llei elleutoral, a Andecha Astur informósemos que teníemos que recoyer la firma de más de 1.000 presones censaes n’Asturies nun plazu de 20 díis, una torga antidemocrática dafechu cola que l’Estáu pretende llimitar la participación de formaciones polítiques minoritaries.

Desixéronmos 1.000 firmes pa poder presentamos a les elleiciones y nós diximos que non, que conseguiríemos diez mil firmes y nós fadremos d’eses diez mil firmes diez mil voces, diez mil puños n’altu y diez mil  prrsones dimpuestes a lluchar pola Republica Asturiana.

 

 

 

Deja una respuesta

Tu dirección de correo electrónico no será publicada. Los campos obligatorios están marcados con *