La Xunta Nacional d’Andecha Astur considera que nun se dan les condiciones polítiques pa presentar una candidatura propia y llamenta la oportunidá perdía de construyir una alternativa xunitaria asturiana. La organización critica la nueva apuesta de Somos Asturies por opciones estatalistes y perafita’l so compromisu con una izquierda soberana, independiente y comprometida colos intereses del pueblu asturianu.
La Xunta Nacional d’Andecha Astur, aconceyada esti fin de selmana, decidió nun concurrir a les elecciones estatales del próximu 29 de payares, tres analizar la situación política actual, les posibilidaes reales de representación y l’ausencia d’un alcuerdu ente les organizaciones asturianes d’izquierdes pa presentar una candidatura propia.
Esta decisión nun supón una renuncia a la participación política nin a la defensa de los intereses nacionales y sociales d’Asturies. Bien al contrariu, respuende a la necesidá d’actuar con coherencia y responsabilidá, reconociendo que nestes circunstancies nun se dan les condiciones polítiques y organizatives necesaries pa facer d’una candidatura ellectoral una ferramienta útil pal avance de les reivindicaciones del nuesu pueblu.
Como yá se punxo de manifiestu nel Conceyu Estraordinariu del Díi de la Nación Asturiana, la nuesa organización vien analizando les distintes convocatories ellectorales dende una perspectiva que va más allá de la participación institucional inmediata.
Andecha Astur entiende que les elecciones nun son un fin en sí mesmes, sinón una ferramienta al serviciu d’un proyeutu políticu. La construcción d’una alternativa nacional asturiana d’izquierdes nun pue depender esclusivamente de los calendarios lelectorales nin quedar reducida a la presentación de candidatures ensin una base social y organizativa suficiente.
El nuesu oxetivu nun ye simplemente tar presentes nes urnes, sinón contribuyir a construyir una fuerza política capaz d’articular les lluches sociales, defender los drechos nacionales d’Asturies y representar de manera efeutiva los intereses de les clases populares asturianes.
Una oportunidá perdía pa la izquierda asturiana
Dende Andecha Astur llamentamos que nuevamente se dexara pasar una oportunidá p’avanzar na construcción d’un Frente Asturianu d’izquierdes que pudiera concurrir a estes elleiciones con una candidatura propia, independiente de los partíos estatales y comprometida cola defensa d’Asturies como suxetu políticu.
Nesti sen, consideramos especialmente negativa la decisión de Somos Asturies d’apostar otra vuelta por una opción estatalista, incorporándose al Frente Amplio estatal ensin esplorar previamente les posibilidaes d’alcuerdu coles organizaciones asturianes que llevamos años defendiendo la necesidá d’una representación política propia.
Esta decisión vuelve poner de manifiestu una enorme debilidá política y organizativa. Política, porque supón aceptar que les estratexes, les prioridaes y les decisiones fundamentales soboe’l futuru d’Asturies se definan fuera del nuesu país. Organizativa, porque revela la incapacidá d’articular una alternativa autónoma y la dependencia d’estructures estatales pa sostener una presencia electoral.
Como yá denunciemos nel posicionamientu públicu del 18 d’ochobre sobre la ausencia d’una candidatura xunitaria asturiana, la xunidá de la izquierda ye necesaria, pero nun pue construyise a costa de la subordinación política d’Asturies.
Nun se trata de refugar la collaboración con otres fuerces progresistes, sinón d’establecer esa collaboración dende la igualdá y la soberanía, ensin renunciar a decidir por nós mesmos les nueses estratexes, aliances y prioridaes.
Asturies nun ye un barriu de Madrid, nin los sos problemes son una cuestión secundaria que pueda resolvese dende despachos alloñaos de la realidá del nuesu país.
La desindustrialización, la perda de población, la precariedá llaboral, les dificultaes d’accesu a la vivienda, la defensa de los servicios públicos o la reconocencia de los nuesos drechos nacionales y llingüísticos necesiten una rempuesta política propia, construyida dende Asturies y comprometida coles necesidaes de la so xente.
Construyir acullá de les elleiciones
Andecha Astur considera que l’ausencia d’una candidatura asturiana nesta convocatoria tien de sirvir pa facer una reflexón colleutiva sobro les debilidaes de la izquierda nacional y sobro la necesidá de superales.
Nun basta con reivindicar la xunidá cuando s’averen les elleiciones. Ye necesario trabayar de manera continuada na construcción d’espacios de collaboración, na articulación de les lluches sociales y nel fortalecimientu d’una conciencia política asturiana que permita convertir les reivindicaciones populares nuna alternativa real de poder.
Esta ye la mesma voluntá que llevó a la organización a proponer la superación de la fragmentación y la construcción d’una candidatura común de la izquierda asturiana, una propuesta que sigue teniendo plena vixencia y que nun pue quedar aparcada pola proximidá d’unes elleiciones estatales.
La decisión de nun concurrir busca precisamente priorizar esi trabayu, evitando consumir esfuerzos nuna candidatura que, nes actuales circunstancies, nun dispondría de les condiciones necesaries p’algamar los oxetivos políticos que xustificaríen la so presentación.
La nuesa organización va siguir presente nes movilizaciones sociales, na defensa de los drechos de la clas trabayadora y na reivindicación del drechu d’Asturies a decidir el so futuru.
La política nun empieza nin acaba nes urnes, y la construcción d’una alternativa de país esixe un compromisu que va muncho más acullá de cada convocatoria ellectoral.
Les próximes elleiciones asturianes, una oportunidá que nun podemos volver perder
Andecha Astur perafita’l so compromisu cola construcción d’un Frente Asturianu d’izquierdes, plural, soberanu y abiertu a la participación de les distintes organizaciones y sensibilidaes que comparten la necesidá d’una alternativa política propia.
Valoramos positivamente qu’Aína asumiera públicamente esta propuesta y mantenemos la disposición a trabayar con toles organizaciones que tean dispuestes a avanzar nesa dirección, dende’l respetu mutuu, la igualdá y la independencia organizativa.
Tamién esperamos que Somos Asturies seya quien a superar, de cara a les próximes elleiciones asturianes, la debilidá política y organizativa que representa la so dependencia de les opciones estatalistes.
Confiamos en que finalmente asuman que Asturies nun ye un barriu de Madrid, sinón un país con personalidá, intereses y drechos propios, y que la defensa d’esos intereses esixe una alternativa política que nun dependa de les decisiones de les direcciones estatales.
Les próximes elleiciones asturianes tienen de ser una oportunidá pa que la sociedá asturiana disponga, por fin, d’una candidatura xunitaria d’izquierdes, inequívocamente asturiana, non sucursalista y capaz d’ufiertar un proyeutu de tresformación social y nacional.
Pa ello, ye imprescindible empezar a trabayar dende agora, ensin esperar a una nueva convocatoria ellectoral y ensin subordinar esti oxetivu a les estratexes de los partíos estatales.
Asturies necesita voz propia. Asturies necesita una alternativa propia.
