Inicio > Asturies > Andecha Astur desixe másimes garantíes pa Munieḷḷos, Reserva UNESCO de la Biosfera
AsturiesMediu AmbientePortada

Andecha Astur desixe másimes garantíes pa Munieḷḷos, Reserva UNESCO de la Biosfera

El nueu miraor ye un fautor de riesgu. Ye mester un Reglamentu urxente d’acesu y usu y, comu solución global, una Llei de Turismu Caltenible

Andecha Astur coincide cola Cordinaora Ecoloxista d’Asturies en que’l nueu miraor conocíu comu Ḷḷagunas de Munieḷḷos, asitiáu nel Picu Candanosa, representa un riesgu importante pal caltenimientu seguru de la viesca que ye Reserva UNESCO de la Biosfera.

Resulta una irresponsabilidá política total controlar y llimitar l’acesu a la Reserva Ñatural mentantu se quier permitir l’acesu llibre al miraor. Esta dexación de control pue permitir que’l trásitu incontroláu y masificáu, o conductes delictives (furtivismu, piromanía), pongan en riesgu una de les mayores ayalgues ñaturales d’Asturies.

Andecha Astur desixe al presidente Adrián Barbón que dedique dalgo del tiempu qu’invierte na so precampaña elleutoral presonal pa iguar soluciones pa Munieḷḷos. Andecha Astur propón, comu midía urxente, l’aprebación d’un Reglamentu d’acesu y usu del miraor, que fixe una cifra másima diaria de visitantes y afite dalgunes midíes básiques pa la seguranza y control del llugar.

En tou casu, Andecha Astur camienta qu’esti Reglamentu nun sedría más qu’una rempuesta puntual y aisllá a un problema xeneral del nuesu país, que necesita con urxencia una Llei de Turismu Caltenible que defina, afale y asegure un nueu modelu de turismu, respetuosu cola identidá y el padremuñu. Andecha Astur señala que lleva yá varios años proponiendo al Gobiernu d’Asturies un modelu concretu de Llei de Turismu Caltenible, pero que Barbón y la FSA-PSOE siguen apostando por monetizar al másimu la política turística, dando puxu sólo a un un modelu masificáu y depredaor del entornu.

One thought on “Andecha Astur desixe másimes garantíes pa Munieḷḷos, Reserva UNESCO de la Biosfera

Deja una respuesta

Tu dirección de correo electrónico no será publicada. Los campos obligatorios están marcados con *