Andecha Astur considera que l’ausencia d’una candidatura xunitaria asturiana y la incorporación de Somos Asturies al Frente Amplio estatal representa una renuncia a la representación política propia d’Asturies. La organización saluda qu’Aina asuma la propuesta d’un Frente Asturianu d’izquierdes y anuncia nuevos contautos p’avanzar na construcción d’una alternativa xunitaria, plural y soberana.
Andecha Astur llamenta la decisión de Somos Asturies d’integrase nel Frente Amplio estatal de cara a les próximes elecciones xenerales, renunciando a impulsar una candidatura asturiana propia, tal como la nuesa organización vien proponiendo dende va años.
Consideramos especialmente grave que, enantes d’adoptar esta decisión, Somos Asturies nun fixera un mínimu esfuerciu por esplorar les posibilidaes d’alcuerdu coles organizaciones polítiques asturianes que defendemos la necesidá d’una representación propia, independiente de les directives y los intereses de los partíos estatales.
Dende Andecha Astur entendemos esta decisión como un xestu de subordinación política, una oportunidá perdía y una renuncia a que los asturianos y asturianes podamos tar representaos como pueblu, con voz propia y capacidá de decisión, y non como una simple estensión territorial periférica de les estratexes diseñaes en Madrid.
Esta actitú revela, al nuesu xuiciu, una debilidá de fondu, que pue ser tanto ideolóxica como organizativa. Ideolóxica, si nun se tien claro qu’Asturies constitúi un marcu políticu propiu, con intereses, necesidaes y derechos específicos, y non una provincia subordinada al marcu estatal. Organizativa, si la falta d’un proyeutu autónomu y de capacidá d’iniciativa lleva a aceptar un papel secundariu n’estratexes polítiques ayenes, en cuentes d’asumir la responsabilidá de lliderar l’alternativa qu’Asturies necesita.
La xunidá de la izquierda ye necesaria, pero nun pue construyise al preciu de la desapaición política d’Asturies. Nun se trata namás de sumar sigles o votos, sinón de decidir quién define les prioridaes, ante quién respuenden los representantes electos y dende ónde se tomen les decisiones. Pa Andecha Astur, la defensa de los derechos sociales, les llibertaes democrátiques y los intereses de les clases populares asturianes nun pue separtase de la defensa de la soberanía política y la identidá del nuesu pueblu.
Esperamos que Somos Asturies reconsidere esta orientación y que la so asturianía dexe de quedar reducida a una cuestión estética o discursiva pa traducise en compromisos y decisiones polítiques concretes en beneficiu d’Asturies. Especialmente, ante les próximes elecciones asturianes, onde va resultar imprescindible demostrar si se tien voluntá de construyir un proyeutu políticu propiu o si se sigue apostando pola dependencia de los partíos políticos d’ámbitu estatal.
Nesti contestu, Andecha Astur valora positivamente que Aína asuma como propia la propuesta d’un Frente Asturianu d’izquierdes, una iniciativa que la nuesa organización vien proponiendo dende va años y que consideramos cada vegada más necesaria.
Esti frente tendría de constituyise como un espaciu de collaboración política sobre bases d’igualdá, respetu a les distintes sensibilidaes ideolóxiques y organizatives, y reconocencia del derechu d’Asturies a decidir el so futuru. Una ferramienta xunitaria que nun esixa la disolución de les organizaciones participantes nin la renuncia a les sos identidaes, pero que permita articular una alternativa común, asturiana, d’izquierdes y comprometida cola tresformación social, basándose nunos principios mínimos comunes.
Por ello, anunciamos que vamos ponenos nuevamente en contautu con Aína pa esplorar les posibilidaes d’avanzar nesti camín de xunidá, col convencimientu de que les diferencies existentes nun tienen por qué ser una torga insalvable cuando se comparte la necesidá d’una representación política propia pal nuesu país.
Per otra parte, la próxima Xunta Nacional d’Andecha Astur va valorar y decidir la participación de la organización nes elecciones xenerales convocaes pal 29 de payares. Esta decisión va adoptase teniendo en cuenta, d’una parte, les dificultaes oxetives p’algamar resultaos electorales granibles nes actuales circunstancies y, d’otra, les consecuencies polítiques de qu’Asturies quede ensin una candidatura propia que defenda los sos intereses dende una perspectiva nacional asturiana.
Somos conscientes de les llimitaciones existentes y de la necesidá de facer un análisis realista de les posibilidaes electorales. Pero tamién entendemos que la presencia política d’Asturies nun pue midise namás en términos de rentabilidá electoral inmediata, porque ta en xuegu la capacidá del nuesu pueblu pa disponer d’una voz independiente.
Andecha Astur perafita asina’l so compromisu cola construcción d’un Frente Asturianu d’izquierdes, plural y soberanu, convencida de que la unidá imprescindible ye la que naz d’Asturies, respuende a los intereses del pueblu asturianu y nun depende de decisiones tomaes fuera del nuesu país.
