Cellebremos los homenaxes a los Mártires de Carbayín y a Belarmino Tomás, perafitando’l nuesu compromisu cola soberanía asturiana y la tresformación social.
Güei, 12 d’ochobre de 2026, aconceyemos en Carbayín y Pando pa honrar a quien mos precedieron na llucha y reivindicar la vixencia del so exemplu. En caún de los actos participaron más d’una ventena de persones. Dende Andecha Astur llevamos a dambos homenaxes una propuesta que consideramos necesaria y urxente: recuperar l’espíritu de la xunidá obrera d’Ochobre del 34 y avanzar hacia un frente común de la izquierda asturiana que seya quien a enfrentar el xorrecimientu del facismu.
Carbayín: memoria y xunidá obrera
En Carbayín, la compañera Llucía Fernández recordó na so intervención política a les 24 persones asesinaes na represión posterior a la Revolución. Yeren trabayadores y campesinos, xente del pueblu que participara nel llevantamientu ensin ocupar puestos d’especial responsabilidá. Denunciamos que fueron executaos cuando yá se firmara’l pactu que punxo fin a la llucha, incumplíu pol Gobiernu de la República Española.
La so memoria interpélanos güei. Cuando vemos espoxigar el facismu español y normalizase los discursos que xustifiquen la violencia machista, racista, homófoba o policial, sabemos que tenemos la responsabilidá d’organizanos y actuar. Honrar a los Mártires de Carbayín esixe conocer la so hestoria, tresmitila y dar continuidá al so compromisu.
Como señaló Llucía Fernández, la principal enseñanza d’Ochobre ye «l’alianza obrera y la necesidá d’axuntar fuercies y facer les coses en comuña, comu pueblu». Quienes protagonizaron aquella llucha supieron xunise perriba de les sos diferencies porque compartíen la conciencia de ser pueblu, de ser trabayadores y de ser asturianos. Esi ye l’exemplu del que tenemos que deprender.
Por eso tendemos la mano a quienes compartan la voluntá de tresformar la nuesa realidá. Queremos construyir entendimientu ente proyectos y sensibilidaes distintes, con Asturies como marcu específicu de llucha y dende la solidaridá con otros pueblos. La xunidá que proponemos precisa del respetu mutuu y del compromisu de trabayar en comuña.
Pando: soberanía y compromisu con Asturies
En Pando reivindiquemos la Revolución d’Ochobre, la República Obrera y Campesina d’Asturies, el Conseyu Soberanu y al nuesu presidente, Belarmino Tomás. Afirmamos que seguimos equí, que tovía hai asturianes y asturianos dispuestos a defender la soberanía del so país y a lluchar pola tresformación social.
Reivindiquemos el calter asturianu d’Ochobre del 34 frente a les interpretaciones que lu amenorguen a una revuelta esclusivamente minera. Recordamos la declaración de soberanía de 1937 y denunciamos el Principáu y l’Estatutu d’Autonomía como una institución y un marcu impuestu dende Madrid que’l pueblu asturianu nun tuvo la posibilidá de votar.
Tenemos presente l’esfuerciu de quienes sostuvieron aquelles lluches, incluso cuando se sintieron cansaos, desilusionaos o sobropasaos poles circunstancies. Siguieron porque sabíen que’l futuru había que ganalu. A nós correspuéndenos asumir agora la nuesa responsabilidá y convertir la memoria en compromisu políticu.
Llamamos a superar les dependencies de les direcciones polítiques de Madrid y a xuncir voluntaes nun frente común de la izquierda asturiana. Dende Andecha Astur vamos siguir trabayando por esa xunidá, respetando les distintes espresiones polítiques y personales, ensin más amu que’l Pueblu Asturianu.
Presidente Belarmino Tomás: seguimos na llucha. Equí too ye frente. Nun hai retaguardia.
¡Puxa Asturies!
