Inicio > Asturies > Andecha Astur cellebra qu’el “Principado” asuma’l 25 Mayu
AsturiesPortada

Andecha Astur cellebra qu’el “Principado” asuma’l 25 Mayu

Dempués de les reiteraes propuestes d’Andecha Astur nesi sen, consideramos un trunfu la reconocencia de la Declaración de Soberanía asturiana

  Pesia’l calter esllabazáu de la cellebración istitucional remembrando estos fechos, nun tonu menor y falsiando la so sinificación hestórico, Andecha Astur considera tou un trunfu qu’el “Principado” reconoza por primer vegada una de les partes más significatives de la historia d’Asturies cuya importacia y trescendencia veníen siendo negaes por esta istitución impuesta dende Madrid.

Nesi sen, recordamos que tovía esti añu Andecha Astur propunxo a la Xunta Xeneral l’aprebación d’un conxuntu iniciatives pa reconocer y cellebrar istitucionalmente que’l 25 mayu de 1808 la Xunta Xeneral exerció una temprana reconocencia política de la soberanía popular de les asturianes y asturianos. Declaróse soberana, formó l’Exércitu Defensivu Asturianu, dotóse d’embaxaores d’Asturies qu’unvió al Reinu Xuníu. Aquella Xunta Xeneral, amás, anició tribunales propios, istitucionalizó la bandera d’Asturies y collaboró col Pueblu Asturianu na defensa’l país astur y na escoyeta’l so futuru.

Son toos ellos unos fechos de tala importancia na hestoria de cualisquier pueblu que los protagonice, que los sos sucesores tienen la obligación hestórica, política y ciudadana de reconocelos y remembralos cola dinidá que representen.

Ello asina, al empar que cellebramos que’l “Principado” tea qu’asumilos, consideramos que’l Gobiernu de Barbón -que ye sofitáu istitucionalmente por IU y Podemos- nun debería tener problema dalu p’aprebar la propuesta presentada por Andecha Astur, cola que bramente se reconoz y honra la hestoria d’Asturies y aquellos díis nos que se reconoció que’l Pueblu Asturianu yera soberanu y dueñu’l so destín.

Les midíes propuestes a la Xunta Xeneral por Andecha Astur son éstes:

  • Que la Xunta Xeneral declare’l 25 mayu de ca añu comu fecha de necesaria cellebración istitucional por parte Gobiernu d’Asturies y la Xunta Xeneral, remembrando la declaración d’esta comu entidá soberana d’Asturies en 1808.
  • Que’l 25 mayu de ca añu la Xunta Xeneral convoque una sesión estraordinaria del so Plenu, na que se llea un testu de remembranza d’aquella declaración soberana d’Asturies.
  • Que’l 25 mayu de ca añu el Plenu de la Xunta Xeneral visite istitucionalmente la Sala Capitular d’Uviéu, onde asocedió la hestórica declaración de soberanía.
  • Que’l 25 mayu de ca añu la Sala Capitular de la Catedral d’Uviéu permaneza abierta al públicu pa la so conocencia y reconocimientu.

 

Frente a estes propuestes, el tibiu reconocimientu del “Principado” resulta insuficiente, y espeya la so falta de voluntá política d’asumir dafechu aquellos fechos hestóricos, sicasí, consideramos que ye un primer pasu al que seguirán otros, que perafita’l drechu del pueblu asturianu a decidir llibremente, a la Soberanía.

N’alcordanza de les muyeres y homes que’n 1808 defendieron Asturies y el nuesu drechu a decidir. ¡Puxa Asturies!

Deja un comentario

Tu dirección de correo electrónico no será publicada. Los campos obligatorios están marcados con *