Andecha Astur acaba presentar na Fiscalía Superior d’Asturies una denuncia escontra Adrián Barbón Rodríguez, na so condición de Presidente del Gobiernu asturianu, acusándolu de dos supuestos delitos: prevariación y cohechu
L’acusación ye duple. Per un llau acúsase-y de posible delitu de prevaricación por convertir la figura’l Presidente nel oxetu-premiu d’un concursu promocional, bien publicitáu, d’una empresa editorial privá (la del diariu La Nueva España), faciendo de guía sólo y esclusivamente pa dos grupos de lletores del diariu nuna visita al Palaciu Presidencial, asitiáu na cai Suárez de la Riva, n’Uviéu. Ye tamién un supuestu delitu de prevaricación el fechu de que’l Presidente ceda pa intereses privaos, promocionales y llucrativos, un edificiu públiu d’usu oficial y restrinxíu, comu ye’l Palaciu Presidencial.
Adrián Barbón púnxose amás al sirviciu de solamente una de les empreses privaes de comunicación qu’hai n’Asturies, ufriendo a ésta tratu de privilexu y poniendo a les demás empreses del seutor nuna situación de discriminación y desventaxa.
Andecha Astur acusa a Barbón de que, con esti proceder, pervierte la dinidá, les fonciones llegales y la categoría d’autoridá pública que tien el cargu de Presidente del Gobiernu asturianu, convirtiendo esta figura en mercancía comercial y oxetu promocional, sometiéndolu al porgüeyu d’una empresa privá.
Asturies tuvo la llaceria de tener presidentes torpes, otros prepotentes y fasta dalgunos corrutos, pero nunca nun tuviéremos entá un Presidente que fore l’oxetu-premiu d’una rifa comercial. Rebaxar la dinidá del cargu de Presidente d’Asturies a la categoría de perru-pilotu d’una tómbola d’intereses empresariales ye dalgo enxamás visto, humildante pa toa Asturies, y polo qu’Adrián Barbón debería abrir un procesu de reflexón sobro si bramente tien les cualidaes polítiques y democrátiques mínimes pa siguir nel cargu qu’ocupa.
El supuestu de prevaricación ye tan escandalosu, qu’a Andecha Astur resúlta-y poco creyible qu’Adrián Barbón tomare estos determinos, tan dafechamente contrarios a los deberes del so cargu, de forma desinteresá. Polo que tamién pide a la Fiscalía qu’abra dilixencies d’investigación sobro la posible esistencia d’un delitu añadíu de cohechu. Esto ye, que s’investigue si’l presidente solicitó o recibió dádives o favores comu contraprestación a los sirvicios comerciales qu’ufrió a la empresa editorial, incluyendo posibles compromisos de tratu informativu preferente por parte del diariu La Nueva España haza la figura del Presidente del Gobiernu asturianu.
