Andecha Astur pide la mayor rempuesta social posible pa retirar el nome de “Juan Carlos I” a una avenía de Xixón

Andecha Astur-Xixón aconceyó ayeri col presidente de Asturies Socialista, Nacho Morán, que presentó a Andecha Astur la so iniciativa de recoyer firmes d’asociaciones y particulares pa defender que l’actual “Avenía Juan Carlos I” camude de nome.

Andecha Astur considera mui importante esa iniciativa d’Asturies Socialista y felicítase de que surdan munches iniciatives nesti sen, porque espera que los grupos municipales d’esquierda seyan sensitibles a esi pidíu, que yá propunximos formalmente al Conceyu Xixón.

Coincidimos dafechamente con Asturies Socialista en que nuna ciudá asturiana y progresista, comu Xixón, camudar el nome a esa avenía ye una meta bien posible, porque nun ye d’esperar que dengún de los grupos municipales de PSOE, IU y Podemos vote escontra o s’astenga nun pidíu que ye tan simbólicu comu importante, polo que tien de defender un modelu políticu democráticu y sofitáu nel determín soberanu del pueblu asturianu, non nunos privilexos heredaos xenéticamente y sosteníos manu militari pol Estáu español.

D’esti mou, animamos a tola ciudadanía xixonesa a que, pelos calces que considere más amañosos, comunique al Conceyu Xixón la so solidaridá con esi sentimientu común: denguna cai de Xixón pa un rei Borbón.