Ente los incendios: Repoblación con especies autóctones

Andecha Astur pide a Barbón que los conceyos incendiaos seyan declaraos llibres d’arboláu perinflamable y que se repueblen los montes con especies autóctones

Estes xornaes, controlaos los fueos, el presidente Adrián Barbón recorre, con chaqueta roxa, los conceyos afeutaos polos caberos incendios y fae declaraciones de futuru que-y salen gratis. Mentandu se dedica a esta publicidá prelleutoral, Andecha Astur acaba presenta-y una propuesta de trabayu: que los conceyos incenciaos seyan declaraos llibres d’arboláu pirolíticu (d’alta inflamabilidá), de mou que los ocalitos y los pinos seyan sostituyíos por arboláu autóctonu.

Tando los montes quemaos y siendo necesaria una replantación, ye’l momentu d’entamar iniciatives comu ésta, que mos llibren d’especies que, por ser foriates, tienen efeutos dañibles sobro especies autótones, representen una menacia pa la biodiversidá vexetal, tienen los inconvenientes de foncionar comu monocultivos, emprobecen los suelos, faen que los montes se xestionen con criterios de rentabilidá industrial, la so esplotación maerera erosiona abondo los suelos y, amás, presenten un altu riesgu de combustión.

Les vecines y vecinos de Valdés, Tinéu, Allande, Piloña, Amieva, Balmonte, Cabrales, Cangues d’Onís, Grao, Llaviana, L.lena, Llanes, Morcín, Ribesella, Samartín… necesiten daqué más que visites presidenciales y palmaínes nel llombu. Necesiten, sobro too, financiación especial pa compensar los daños de los incendios y midíes práutiques pa qu’éstos nun se repitan.

Andecha Astur yá propunxo nos díes de la gran quema l’entamu d’una mesa téunica de negociación cola Guardería del Mediu Ñatural, Brigaes d’Investigación d’Incendios Forestales (BRIPAS) y Bomberos d’Asturies, pa definir un Reglamentu téunicu sobro la prevención y xixilancia de los incendios, disposición y emplegu de recursos materiales y homanos, intervención nos incendios ya investigación de los mesmos.

Y tamién propunximos una nuea Llei de Montes y Ordenación Forestal, ansí comu un nueu Plan Forestal p’Asturies, ellaboráu cola participación d’agricultores, ganaeros, organizaciones ecoloxistes, Guardería del Mediu Ñatural, BRIPAS…

Agora, señalamos qu’una política de reforestación afayaíza aprofitaría esta triste situación que mos dexaron los incendios, y un gobiernu comprometíu col futuru d’Asturies aprofitaría pa regular replantaciones con árboláu autóctonu, apostando por rexenerar les viesques asturianes tradicionales, que, teniendo una bona xestión, son fonte de riqueza pa los conceyos que les esfruten.