Inicio > Asturies > Andecha Astur denuncia énte la UNESCO les inmatriculaciones del prerrománicu asturianu
AsturiesCultura asturianaInternacionalPortada

Andecha Astur denuncia énte la UNESCO les inmatriculaciones del prerrománicu asturianu

Pide al Centru de Padremuñu Mundial de la Unesco la urxente incluxón na Llista del Padremuñu Mundial en Pelligru” de los elementos del Prerrománicu Asturianu que son Padremuñu Mundial y fueron inmatriculados pola ilesia católica

Na denuncia presentada por Andecha Astur énte’l Centru de Padremuñu Mundial de la Unesco, recuérdase qu’Asturies cunta con seyes costrucciones monumentales del Arte Asturianu (tamién llamáu Prerrománicu Asturianu) que son Padremuñu Mundial reconocíu pola UNESCO, y que como tales, atópense sol amparu internacional que representa la Convención sobro la proteición del padremuñu mundial, cultural y natural”, aprobada pola Conferencia Xeneral de la Organización de les Naciones Xuníes pa la Educación, la Ciencia y la Cultura (París, 1972), a la que s’acoyó l’Estáu español en 1982.

Asina mesmo, rellátase’l procesu pol cual la ilesia católica inmatriculó inmuebles públicos como privaos, y cómo’l gobiernu del “Principado” foi cómpliz nesi procesu, negándose a facilitar el llistáu ellaboráu de manera oficial pol Colexu de Rexistradores de la Propiedá d’Asturies, nel que se recueyen diches inmatriculaciones, ente les que s’atopen dalgunos de los monumentos asturianos que la UNESCO declaró Padremuñu Mundial; ello ye, en dalgún momentu pasaron yá de ser un monumentu públicu a ser propiedá privao de la Ilesia católica.

L’apropiación de la titularidá d’esos monumentos supon el fin de los criterios que l’Alministración pública reconocía a efeutos de caltenimientu, rehabilitación, divulgación y disposición pa les visites y l’estudiu artísticu, científicu y téunicu de dichos monumentos; desconociéndose fasta’l momentu los criterios que va aplicar nestos aspeutos el nuevu propietariu priváu, la Ilesia católica.

L’Estáu español, permitiendo’l pasu de titularidá público a privao d’estos monumentos, incumplió l’artículu 5, lletra d, de la Convención sobro la proteición del padremuñu mundial, cultural y natural”, que, ente otres coses, obliga a los estaos a adoptar les midíes xurídiques y alministratives afayaíces pa, protexer y caltener esi padremuñu. Nel Estáu español l’Alministración pública permitió que se manipolie la propiedá pública d’esti padremuñu históricu pa convertilo en propiedá privao; ello ye, consintió perder la so titularidá y eso supon un altu factor de desproteición y riesgu pal futuru d’esos monumentos.

Ye por ello polo qu’Andecha Astur solicita al Centru de Padremuñu Mundial de la UNESCO:

  • Qu’asuma que los fechos equí denunciaos suponen una situación de grave pelligru pa los monumentos del Arte Asturiano reconocíos pola UNESCO como Padremuñu Mundial.
  • Qu’empecipie un procesu indagatoriu sobro la situación rial de los monumentos del Arte Asturianu reconocíos pola UNESCO como Padremuñu Mundial. Y que nesi procesu demande al Gobiernu del “Principado” un informe oficial sobro quién ye anguañu’l titular rial de los monumentos reconocíos como Padremuñu Mundial. Y si el propietariu resultara ser la Ilesia católica, que se demande al Gobiernu del “Principado” un informe sobro en qué fecha y por qué xides esos monumentos dexaron de ser de titularidá pública, y de cómo valora’l Gobiernu qu’esa situación pue afeutar al futuru de dichos monumentos y a la especial proteición que pa ellos desixe la UNESCO.
  • Que darréu qu’esisten nicios importantes y suficientes de que siquier una parte del Padremuñu Mundial reconocíu pola UNESCO en Asturies pasó a titularidá privao por mecanismos discutibles y ensin garantíes sobro’l so futuru, por un cambiu de la propiedá de la tierra (Artículu 11, puntu 4 de la Convención sobro la protección del Padremuñu mundial, cultural y natural”), solicitamos que, con calter provisional y preventivu, el Centru de Padremuñu Mundial alcuerde la urxente incluxón de tolos monumentos del Arte Asturianu reconocíos como Padremuñu Mundial na Llista del Padremuñu Mundial en Pelligru”, pa garantizar la so especial proteición nestos momentos de grave incertidume sobro’l so futuru.

Deja una respuesta

Tu dirección de correo electrónico no será publicada. Los campos obligatorios están marcados con *