Inicio > Asturies > Homenaxes al Ochobre asturianu
Asturies

Homenaxes al Ochobre asturianu

El prósimu 12 d’ochobre, Andecha Astur homenaxeará a los revolucionarios d’ochobre del 34 na figura de Belarmino Tomás y de los Mártires de Carbayín, símbolu de la represión de la República Española escontra la revolución asturiana

Esti añu la convocatoria sedrá doble, a les 12 hores nel cimenteriu Carbayín, onde ta la tumba de los 24 asturianos asesinaos pol exércitu de la República Española na represión que siguió l’aplastamientu de la revolución asturiana, y per otru a les 13:30 hores nel cimenteru pandu, onde s’afaya la tumba de Belarmino Tomás, , presidente del Conseyu Soberanu y ún de los principales protagonistes de la revolución d’ochobre del 34, siendo l’interllocutor que negoció col exércitu de la República Española una rendición pautada que llueu los españoles nun respetaríen, protagonizando una represión sangrina y xabaz.

L’homenaxe a la República Obrera y Campesina d’Asturies declarada n’ochobre del 34 frente a la República Española, qu’incapaz de respetar el Drechu a Decidir del Pueblu Asturianu procedió a invadir militarmente’l nuesu país, ye un referente de renovada actualidá, en tantu que se caltién la situación de represión de los drechos nacionales y sociales del pueblu asturianu, y el determín de superalo recurriendo al exerciciu del drechu a la Soberanía, cola proclamación de la República Asturiana como finxu a algamar.

Arriendes d’ello, los fechos hestóricos d’aquellos asturianos y asturianes son un exemplu perenne pal nuesu Pueblu, y una alternativa siempres presente frente al proyeutu d’esfarrapamientu, esaniciu, paru, precariedá, emigración forciada de la mocedá y asimilación colonialista que l’Estáu español tien entamáu p’Asturies.

Per otu llau, la fecha del 12 d’ochobre resulta especialmente interesante, tanto por asitiase metanes del periodu revolucionariu asturianu, como pola sinificación españolista d’esa xornada, na que l’Estáu español cellebra una “Hispanidá” que nun ye más que una xornada d’esaltación del so patrioterismu colonialista.

LLUNES  12 D’OCHOBRE

12:00 Homenaxe a los Martires de Carbayín. Cimenteriu San Xuan. Carbayín – Siero

13:30 Homenaxe a Belarmino Tomás. Cimenteriu Pando – Llangréu

Deja una respuesta

Tu dirección de correo electrónico no será publicada. Los campos obligatorios están marcados con *