Andecha Astur califica de desastre’l llabor d’Adif na llínia Llaviana-Xixón y a Barbón de consentior

Disiximos que la Ministra Tresportes aconceye n’Asturies con Barbón p’afitar un Plan Estratéxicu del Tresporte Ferroviariu n’Asturies, qu’incluya l’apertura negociaciones p’asumir les tresferencies nesta materia

Andecha Astur ye l’únicu partíu que presentó entrugues nel Congresu al Gobiernu español pola crisis de los trenes XXL de l’antigua FEVE. Porque considera que’l ferrocarril, y en concreto’l proyeutu l’Asturtren, tien de ser l’exe de la política de tresportes públicos n’Asturies.

Asina esmolecíos, Andecha Astur tien la obligación de calificar comu desastre’l llabor qu’Adif ta faciendo p’ameyorar la llínia Llaviana-Xixón. Y el papel de testigu mudu que xuega’l presidente Adrián Barbón, fae d’él un claru consentior de les chapuces d’Adif. El Gobiernu asturianu tien de camudar la so actitú de calláu obediente énte Madrid por iniciatives polítiques urxentes que defendan los intereses de los viaxeros asturianos.

N’Andecha Astur consideramos que…

1. Ye necesario reconsiderar si la igua d’esta llínia tren necesita alteriar durante tantu tiempu’l sirviciu normalizáu y de calidá que necesiten les poblaciones del recorríu. El tramu Llaviana-El Berrón córtase dafechu del 1/9/2022 al 15/3/2023; y el tramu El Berrón-Xixón córtase parcialmente del 1/9/2022 al 15/6/2023.
2. Hai qu’analizar si’l tresporte alternativu ye suficiente, eficaz y nun ta recortando los drechos de los usuarios a un tresporte de calidá que satisfaga les sos necesidaes.
3. Ye una vergoña que les obres se retrasen entá más porque Adif nun ye quién a dotar les obres y los materiales de les midíes de seguranza que son mester, permitiendo asina que se-y causen daños y se roben materiales por valor de 170.000 €.
4. Nun tien un pase la falta planificación d’Adif, qu’agora tamién va retrasar la obra porque nun ye quién a asegurar l’abastecimientu puntual de materiales necesarios.
5. Les obres tán inorando la necesidá y el compromisu de soterrar les víes al so pasu per Llangréu. Y, lo que ye más kafkiano entá, porque la propia Adif valoró mal la intensidá de les obres de reforma que son necesaries en dalgunos tramos.

Amosamos la nuesa solidaridá col vecindariu afeutáu por esti desastre de planificación y execución de les obres. Y proponemos al Gobiernu asturianu que, pa solucionar el conxuntu de graves problemes qu’afeuten n’Asturies el tresporte ferroviariu, acuda a Asturies la Ministra Tresportes y entamen dambes alministraciones el diseñu d’un Plan Estratéxicu del Tresporte ferroviariu n’Asturies, qu’incluya l’apertura negociaciones pa que’l Gobiernu asturianu puea asumir n’esclusiva tresferencies efeutives nesta materia.